Имплементација на консензуално законодавство при одлучување и заедничка одговорност, а со десетте стратешки државни институции заеднички ќе управуваат по еден Македонец и Албанец кои ќе имаат заеднички права за потпишување. Ова, меѓу другото, го нагласи Насер Зибери, кандидат за премиер на ДУИ, при денешната негова промоција на програмата што се одржа пред Владата. Во обраќањето пред присутните тој истакна дека има непартиски план што го оцени како добар за општеството.
Зибери во настапот нагласи дека ќе се залага за еднаква дистрибуција на јавните инвестиции, односно главните економски одлуки (буџет, инвестиции, даноци) на владата да не можат да се носат без поддршка од мнозинството членови на албанскиот кабинет. Една од неговите заложби ќе биде и воведување на задолжителни часови по албански јазик во секое училиште, почнувајќи од
петто одделение, а ќе предложи и 13 август, денот на потпишување на Охридскиот договор, да биде национален ден.
Една од неговите иницијативи, како што рече, ќе биде и менување на химната.
„Предлагам да се постигне консензус за химната на нашата земја, да се рефлектира оваа разновидност, затоа што овој симбол не треба да биде симбол на исклучивост и нееднаквост, туку на сеопфатност и еднаквост“, рече Зибери.
Доколку добие доверба да застане на чело на владата, Зибери најави политика за нула даноци што го образложи со нула данок на добивка за три години за секое вработување што ќе биде прво за лице до 35 годишна возраст и нула даноци за компании за период од три години за секое самовработено лице под 35 годишна возраст.
Зибери ќе се залага и за воведување на флексибилно работно време во текот на неделата и пола работен ден во петок, потоа Закон со кој се забрануваат казина и игри на среќа на поблиску од еден километар од училиштата, од црквите и од џамиите, минимална плата од 600 евра за секоја медицинска сестра, наставник и учител.
„Ова не е збирка на ветувања. Во програмата имам 25 конкретни иницијативи и чекори, како мои приоритети за првите 100 дена од мандатот како премиер. Ова се мои ветувања до вас, граѓаните на земјата. Нема генерички фрази, нема политички пароли, без замоци од песок во воздухот. Но, затоа има конкретни, искрени и достижни мерки што владата
мора да ги преземе што е можно поскоро во областа на економското закрепнување, заштитата на работните места, образованието, развојот на инфраструктурата, правдата и еднаквоста“, рече Зибери.
Посочи дека Македонците не треба да ја гледаат еднаквоста како закана и никој не сака да земе ништо од нив – напротив, еднаквоста ќе им служи на сите и ќе ја придвижи земјата напред.
„Моето силно верување е дека она што е добро за Албанците во оваа земја е добро и за Македонците“, рече Зибери.