Пепе (35) се спакува и замина од Бешикташ. Португалскиот дефанзивец во Истанбул пристигна во минатото лето од Реал Мадрид како слободен играч. Со турскиот прволигаш потпиша двегодишен договор и со заработувачка од 5 милиони евра стана најплатен играч во клубот. Но, финансиските проблеми во кои западна „црно-белите“ и неколкуте неисплатени плати беа причина да побара предвремен раскин на соработката, предлог што наиде на одобрување кај управата која на тој начин се заштити од евентуална тужба.
Притоа Португалецот се погрижи да одлета од Босфорот во голем стил. Откако постигна договорот со клупските челници и го сподели со соиграчите, направи голем гест што долго ќе остане во паметење кај персоналот во клубот кој исто така имаат побарувања за заостанати плати. Пепе на заминување ги исплати вработените од свој џеб, ги почести со коверти економот, куварките и сите лица што се придружен дел во секоја фудбалска екипа и чија работа не е видлива на терен.
Пепе, кој сега е слободен играч и може да договори нов ангажман во зимскиот преоден рок, одигра 53 натпревара за Бешикташ што ги зачини со седум гола и три асистенции. Само во тековната сезона пет пати ги тресеше противничките мрежи, трипати во турското првенство и двапати во Лига Европа. Фудбалерот, кој е роден во Бразил, пред Бешикташ и Реал Мадрид играше уште за Порто и за Маритимо во Португалија.