Албанија ќе гостува во Македонија наесен со нов селектор во квалификациите за СП 2018. Џовани де Бјази го напушти кормилото на националниот тим на западниот сосед. Причините за изненадувачката вест од Тирана се непознати. Велиме изненадувачка со оглед дека Албанците под водство на Италијанецот го направија најголемиот успех во својата фудбалска историја со пласманот на ланското Европско првенство во Франција.
„Долго размислував за својата одлука и на крајот решив да заминам. Зад себе оставам добар и формиран тим“, рече Ди Бјази на средба со новинарите.
Де Бјази беше на селекторската функција декември во 2011 година. Ќе остане забележан како креатор на историскиот подвиг во квалификациите за ЕП 2016 во кои успеа Албанците го освоија второто место во групата со Португалија, Данска, Србија и Ерменија и директно се пласираа на континeнталниот турнир. Во 2015 година доби и албанско државјанство.
Настапите во Франција ги завршија со порази од Швајцарија (0:1) и од Франција (0:2) и со триумф над Романија (1:0). По шест одиграни кола во квалификациите за СП 2018, Албанија е трета во групата Г со девет бода, седум помалку од водечките Шпанија и Италија.
Албанската фудбалска репрезентација ќе гостува во Македонија на 5 септември. Во Скадар, лани во септември, ги совлада „црвено-жолтите“ со 2:1. Мечот беше прекинат во финишот поради силно невреме при резултат 1:1 и доигран наредниот ден.