Каролина Возњацки стартуваше со пораз на завршниот ВТА Мастерс во Сингапур. Бранителката на титулата од Данска загуби од Каролина Плишкова со 2:6, 4:6 во првиот меч од Белата група на турнирот на најдобрите осум тенисерки во сезоната што се игра за награден фонд од седум милиони долари.
Плишкова започна силно и освои пет гема во серија за предност со 5:1 што подоцна рутински го претвори и во водство во сетови со 1:0.  На почетокот на вториот сет, повторно направи брејк против шампионката од Австралија Опен што го потврди и успеа да го задржи до крајот за победнички вовед на Мастерсот.
Во вториот меч во Белата група, шесторангираната Елина Свитолина од Украина оствари триумф над четвртата носителка и шампионка на турнирот во 2011 година, Петра Квитова со 6:3, 6:3.