Украинскиот претседател Володимир Зеленски ја напушти земјата по втор пат од почетокот на војната – по посетата на Велика Британија и Франција каде вечераше со Макрон и Шолц зад затворени врати, денеска ќе зборува во Брисел. Една од темите за кои се разговараше во Лондон беше барањето на Киев за помош во борбени авиони. Во исто време, сојузниците најавуваат испорака на тенкови во Киев.
Украинскиот претседател Володимир Зеленски и францускиот претседател Емануел Макрон заедно ќе отпатуваат на самитот на ЕУ, што денеска се одржува во Брисел, соопштија од кабинетот на Макрон. Зеленски вчера ја започна мини турнејата низ европските метрополи со цел да ги охрабри лидерите на ЕУ да одобрат поголема помош за Украина во вооружување и за брз почеток на преговорите за членство на Киев во Унијата, објави Ројтерс.
Франција цврсто стои до Украина и ја следи во победата, изјави францускиот претседател Емануел Макрон, кој синоќа во Елисејската палата го прими украинскиот претседател Володимир Зеленски. Не смее да и се дозволи на Русија да победи во војната против Украина, рече Макрон, пренесува Ројтерс. Според информациите, францускиот претседател изјавил дека ќе разговара за потребите на Киев со Зеленски и германскиот канцелар Олаф Шолц.
Британскиот премиер Риши Сунак тврди дека „ништо не е надвор од маса“ кога станува збор за воена помош за Украина. По вчерашната средба со украинскиот претседател Володимир Зеленски, Сунак потврди дека тема на нивниот разговор биле борбените авиони. „Тоа е процес. Потребно е извесно време. Ние го започнавме тој процес вчера. Тоа е затоа што сакаме да го поддржиме претседателот и неговата земја во постигнувањето победа. Ништо не е надвор од масата“, додаде тој.
Западните партнери би можеле да го испорачаат првиот баталјон борбени тенкови Леопард 2 на Украина во првите три или четири месеци од оваа година, изјави вчера германскиот министер за одбрана Борис Писториус за време на неговата посета на Полска.
„Би можеле да испорачаме најмалку еден тенковски баталјон во првите четири месеци од оваа година, а можеби и во првите три месеци“, рече Писториус и прецизираше дека првиот испорачан баталјон ќе вклучува 31 тенк, пренесува Ројтерс.
Премиерот на Португалија, Антонио Коста изјави дека е започната поправка на неколку тенкови „Леопард 2“, кои ќе бидат испорачани во Киев, пренесува Ројтерс. Коста изјави дека Лисабон ќе достави три такви тенкови во Киев следниот месец.