Во Врховниот суд стигнаа жалбите за продолжувањето на притворите на осомничените за минатогодишните насилства во Собранието од 27 април, потврдија за НОВА од судот.
Од судот не кажуваат колку точно жалби на одлуката на Апелација за продолжување на притворите се пристигнати. Велат дека станува збор за повеќе жалби, за кои е оформен еден предмет. Ова значи дека Кривичниот совет на Врховниот суд ќе одлучува за сите заедно, а не одделно по секоја жалба.
„Стигнати се повеќе жалби за кои е оформен предмет по кој ќе одлучува судот“, изјавија од судот за НОВА, додавајќи дека штом ќе биде одлучено по нив, ќе излезат со известување.
Одлуката најрано може да се очекува кон средината на следната недела, бидејќи предметот со жалбите прво треба да се достави до Обвинителството за одговор.
Адвокатот Игор Кичеец, кој е еден од бранителите на пратеникот Крсто Мукоски, за НОВА потврди дека поднеле жалба до Врховниот суд и дека очекуваат на Мукоски да му биде укинат притворот.
Кичеец вели дека покрај жалбата доставиле и дополнително барање таа да биде разгледувана на јавна седница, но досега, како што ни изјави, не добиле известување од судот дали нивниот предлог е прифатен.
Од судот, исто така, не можеа да потврдат дали ќе има јавна седница.
„Побаравме од судот јавна седница, но досега немаме добиено одговор оттаму. Ние и претходно баравме укинување на притворот. Мислам дека истрагата е при крај и очекуваме наскоро да добиеме и известување за завршена истрага во однос на делот кој се однесува на нашиот клиент. Сметам дека со самото тоа и основите за одредување на притвор – опасност од бегство, повторување на делото и влијание повеќе не постојат“, вели Кичеец, кој додава дека, според негово мислење, нема потреба ниту од замена на притворот со други поблаги мерки.
Во моментов во затворски притвор се пратениците Крсто Мукоски и Сашо Василевски. Нивните колеги Љубен Арнаудов, Јохан Тарчуловски и пратеникот на Социјалистичката партија, Љупчо Димовски се во куќен притвор, додека на Жаклина Пешевска на барање на Обвинителството и беше укинат куќниот притвор и заменет со мерки на претпазливост.
Апелација, пред петнаесетина дена им го замени затворскиот притвор со куќен на Богдан Илиевски, Борис Дамовски и пратеникот Љубен Арнаудов, Јане Ченто, Иван Цветановски – вработениот во кабинетот на поранешниот претседател на Собранието, Трајко Велјановски и Оливер Радулов од УБК. Истовремено, Апелација го потврди притворот за Мукоски и Василевски.
Инаку, од одлуката на Врховниот суд ќе се знае дали претчувствата на лидерот на ВМРО-ДПМНЕ, Христијан Мицкоски за комплетирање на нивната пратеничка група во Собранието биле оправдани.
„Се надевам и имам чувство дека многу брзо математичките и политичките проблеми ќе бидат надминати и ВМРО-ДПМНЕ ќе може да се врати во Собранието и да биде целосно посветена на работата во Парламентот“, изјави Мицкоски по средбата со премиерот Зоран Заев, минатиот викенд.
Неофицијално, извори во ВМРО-ДПМНЕ велат дека услов за враќање во Парламентот останува комплетирањето на пратеничката група, а тоа значи присуство на сите пратеници во Собранието.