Европскиот клупски ракометен првак од 2003 година во улога на предизвикувач на актуелниот владетел на тронот. Монпелје ќе биде ривал на Вардар на 26 мај од 18 часот во една од двете полуфинални пресметки на Фајналфор турнирот во Лигата на шампиони (ЛШ). За вториот учесник во мечот за титулата ќе разигруваат ПСЖ и Нант на Кире Лазаров (26 мај, 15.15 ч.). Финалето на деветтото издание на завршниот спектакл во „Ланксес арена“ во Келн е закажано на 27 мај.
„Црвено-црните“ немаа посебни желби пред денешната ждрепка во хотелот „Радисон Блу“ во Келн. Свесни дека нема залутани екипи на настанот што ги обединува само најдобрите и најконстантните низ сезоната. Заклучокот го формираа од ланското лично искуство. И сами отпатуваа во Германија како дебитанти што на некој начин ги правеше и аутсајдери, а се вратија во Скопје со престижниот трофеј.
„Не знам зошто, но имав некое чудно претчувство дека ќе добиеме француски тим“, во шега искоментира Стојанче Стоилов алудирајќи на фактот дека и останатите два тима во Келн ќе отпатуваат од земјата на „триколорите“.
Вардар и Монпелје по петти пат ќе се соочат во Келн. Но, значењето на претстојниот натпревар е неспоредливо со претходните четири кои беа во рамки на групната фаза во сезоните 2014/15 и во 2015/16. Билансот е на страна на „црвено-црните“ кои трипати излегуваа како победници (34:26, 30:25, 30:26) и еднаш ремизираа (34:34).
„Сите екипи во Келн имаат по 25 отсто шанси за титулата. Лани бевме аутсајдери на турнирот, а успеавме да ја освоиме титулата. Ситуацијата овојпат е поинаква. Сега ќе патуваме како нејзини бранители“, додаде Стоилов по извлекување на полуфиналните двојки во ЛШ.
Монпелје е моментен лидер во францускиот шампионат и во Келн ќе патува како прв тим што успеал до Фајналфор од долниот дел на шампионскиот формат (групи Ц/Д) на Европската ракометна федерација (ЕХФ). Тоа доволно говори за потенцијалот, сериозноста и амбициите на противникот кој не смее да се потцени.
„Следев нивни мечеви од оваа сезона меѓутоа како обичен гледач. За претстојниот ќе треба и детална анализа. Знам дека имаат различен состав од претходните години, дека играат со многу самодоверба што во голема мера им помогна во успешниот поход до Келн. Сигурно ќе бидат максимално мотивирани да продолжат и чекор натаму. Но, има време. Не сакам уште од сега да прогнозирам и коментирам“, истакна вардаровиот тренер, Раул Гонзалез.
Прв спектакл со топка со сензори што ќе дава информации во реално време
Фајналфор турнирот во Келн, според најавите на ЕХФ, ќе биде прв во европскиот спорт што ќе се игра со т.н. „и-топка“. Технологијата што ќе биде вградена во неа ќе дава информации во реално време како брзината на ударот, дистанца и позиција од каде е упатена кон противнички гол, место во целта што се гаѓа, итн. На проектот се работеше во изминатите две години во ко-релација на маркетингот на ЕХФ, потоа „Селект“, производителот на ракометните топки, и „Кинексон“, германска компанија чија технологија за првпат ќе биде присутна на топ ниво во врвниот ракомет.
Лига на шампиони
Полуфинални двојки за Фајналфор турнирот во Келн
ПСЖ – Нант (26 мај, 15.15 часот)
Вардар – Монпелје (26 мај, 18 часот)
Финале: 27 мај (18 часот)