Македонија го запиша најубедливиот пораз во мечевите од првото коло на Европското првенство за ракометарки до 19 години во Словенија. Хрватска ја оправда фаворитската улога во балканската пресметка во групата Б и славеше со 35:14 (полувреме 14:3) во натпревар во кој немаше никаква неизвесност.
„Одиравме многу слабо во одбрана и загубивме многу топки во напад. Се надевам на подобро издание во наредниот меч со Русија“, беше краткиот коментар на македонскиот селектор, Борче Марковски.
Хрватска не губеше време да покаже кој е кој во салата „Златорог“ во Целје. Набрзина поведе со 2:0, до 11 минута имаше плус пет (7:2), до истекот на првата третина од средбата додаде уште три (11:3) и уште толку во продолжение до паузата (14:3).
Нејзините ракометарки го задржаа нивото во одбрана и напад и во вториот дел на што се надоврзаа и голманките Магдалена Ечимовиќ со 11 одбрани и Јулија Бешен со четири.
Тена Јапунџа и Леонида Гичевска беа најефикасни во двете репрезентации со шест гола.
Шампионатот продолжува денеска со средби од второто коло во кое Македонија од 17 часот ќе игра против Русија.
Женско ЕП во ракомет (У19) – Словенија 2017
Резултати, 1 коло
Група А
Унгарија – Романија 26:21
Шведска – Холандија 23:26
Група Б
Хрватска – Македонија 35:14
Русија – Норвешка 23:15
Група Ц
Франција – Србија 26:21
Шпанија – Германија 20:21
Група Д
Данска – Португалија 32:16
Словенија – Црна Гора 17:24