Актуелниот градоначалник на општина Центар, Андреј Жерновски, преку социјалната мрежа Фејсбук ја потрврди изјавата на премиерот Зоран Заев дека ќе ја повлече својата кандидатура за нов мандат.

Заев во гостување на Телевизија 24, најави дека Жерновски ќе биде дел од централната власт.

„Како одговорен човек и политичар, секогаш ќе ги ставам единството и напредокот пред личните интереси. Затоа ја повлекувам независната кандидатура и давам целосна поддршка на партијата во новата битка која ни претстои.

Во договор со премиерот Заев, одлучив да ја продолжам кариерата на висока раководна позиција во централната власт и да станам дел од партијата која тој ја предводи. Со него имам одлична соработка иголема меѓусебна доверба и почитување. Токму затоа и решив да ја прифатам неговата понуда и заедно да продолжиме во нови победи.

Сакам да Ве уверам дека останувам посветен на Општина Центар и соработката со Вас. Дозволете од се’ срце да Ви се заблагодарам за несебичната поддршка што ми ја дававте изминатите четири години како градоначалник на Центар. Ова беа истовремено најтешките, но и најубавите четири години од мојот живот, во кои искусив и научив многу. Во исклучително бурни времиња, успеавме да направиме многу за општината, но и за соборувањето на режимот на Никола Груевски. Покрај сите притисоци, напади и опструкции, ги разобличивме сите злоупотреби на ВМРО-ДПМНЕ во Центар, но и реализираме 230 проекти од интерес на граѓаните. Иако тие проекти се реализирани исклучиво од сопствениот буџет, односно со 0 денари поддршка од централната власт, во еден мандат направиме повеќе од тоа што во претходни мандати го направија градоначалниците на ВМРО-ДПМНЕ. Јас и мојот тим на ова сме особено горди и знаеме дека сето ова немаше да биде возможно без огроманта поддршка која ја имавме од сите вас“, напиша Жерновски на својот Фејсбук профил.

Претседателот на Владата веќе го најави ова во текот на синоќешното гостување во емисијата „Отворено“ со тоа што рече дека Жерновски бил потребен во извршната власт.