Измени на Кривичниот закон и зголемени казни за напади врз новинари и медиумска работници, бесплатен пристап до Централниот регистар и катастар за истражувачките новинари и скратување на рокот за пристап до тие информации за новинарите – се само дел од барањата кои денес Здружението на новинари на Македонија (ЗНМ) и Самостојниот синдикат на новинари (ССНМ) и на медиумски работници го побарале од премиерот Зоран Заев.
Двете организации соопштија дека претседателката на ССНМ, Тамара Чаусидис и претседателот на ЗНМ Насер Селмани му ги презентирале на премиерот «приоритетите неопходни за подобрување на состојбата со слободата на медиумите».
Во тие приоритети ЗНМ и ССНМ сметаат дека Македонија не смее повеќе да биде земја во која има новинар кој е во затвор и земјата мора да се искачи на високо место во светското рангирање за слободата на медиумите.
Да потсетиме дека новинарот Зоран Божиновски се товари за три дела, но неговата постапка беше во прекин затоа што српските власти кои го уапсија во 2013 година не ѝ го испорачуваа на Македонија сѐ до март годинава, кога во „брза“ постапка, за само еден ден, беше екстрадиран. Тој е еден од осомничените во аферата „Шпион“.
А во однос на слободата на медиумите Македонија годинава се најде на 111-то место од 180 земји во светот според новиот индекс на меѓународната организација „Репортери без граници“. Според нив, медиумските слободи назадувале во целиот балкански регион, но ерозијата на правото била највидлива во Македонија. Овој пад мора да биде сопрен а медиумите да ја вратат својата слобода на изразување.
Чаусидис за НОВА вели дека во владината програма има ветувања за подобрување на условите за работа на новинарите. Но, тие заложби мораат итно да бидат спроведени.
“Итно да се спроведе обврската за скратување на рокот за пристап до документи од Централниот регистар и катастар за истражувачките новинари од сегашните 30 на 15 дена а побаравме и измени на законот за транспаретност на институциите. Побаравме исто така измени во Законот за работни односи за да се подобрат работните права на новинарите и медиумските работници”, вели Чаусидис.
Од двете новинарски организации беа понудени конкретни решенија за финансирање на медиумите и реформата на јавниот сервис.
Според Чаусидис, ЗНМ и ССНМ бараат од новата Влада јавниот сервис Македонската радио-телевизија (МРТ) да има и политичка и финансиска независност и да не се враќа рекламирањето на Владата на МРТ кое е сега под мораториум.
Соопштението од Владата по оваа средба ја пренесува изјавата на премиерот Заев:
„Владата е подготвена во соработка со новинарските здруженија и организации да спроведе итни и квалитетни медиумски реформи. Граѓаните имаат право да бидат навремено и точно информирани. Лошата состојба со медиумите во Македонија, констатирана во извештаите на сите домашни и меѓународни организации, оваа Влада ќе ја смени. Целта на новата Влада е да го заштити достоинството на новинарите и медиумските работници, тие да работат без притисоци, слободно и професионално. За таа цел ќе ги земеме предвид приоритетите изложени од ЗНМ и ССНМ како неопходни во медиумската сфера“, рече премиерот Заев.
“Премиерот Заев и министерот Роберт Поповски задолжен за комуникации, транспаретност и отчетност се обврзаа на отворени комуникации, целосна транспарентност и отчетност на Владата и на институциите”, вели Владата.
ЗНМ и ССНМ веруваат дека нивните барања ќе бидат конечно реализирани и дека тоа ќе се случи брзо бидејќи ситуацијата во македонските медиуми мора итно да биде подобрена.