Корејскиот полуостров влегува во нова, позитивна, фаза во соседските односи. Барем такви се надежите на светската јавност, а како причина за посакуваното затоплување е спортот, поточно, Зимските олимписки игри во Пјонгчанг. Јужнокорејскиот град домаќин се наоѓа на само 80 километри од „блиндираната“ граница на север од каде е потврдено учество на 22 олимпијци во три спорта (лизгање, скијање и хокеј на мраз) на претстојниот планетарен настан.
Официјални претставници на Пјонгјанг и на Сеул претходно договорија заеднички марш под заедничко знаме на дефилето за време на свеченото отворање на Игрите. Договорено е учество и со единствен тим во хокеј на мраз на женскиот турнир, истакнуваат од Интернационалниот олимписки комитет (ИОК).
„Денешниот ден е пресвртница на едно долго патување“, порача Томас Бах, претседател на ИОК, кој додаде дека ваква спогодба меѓу двете страни била незамислива пред само неколку недели и притоа изрази надеж дека „Зимската олимпијада ќе отвори врата за посветла иднина на корејскиот полуостров.
Покрај спортистите, во олимписката делегација на Северна Кореја, како што пренесува агенцијата „Ројтерс“, ќе има и 24 официјална лица и 21 новинар.
Северот ја испраќа женската музичка група „Моранбонг“ на југ
Министерството за обединување на Јужна Кореја преку соопштение ја извести јавноста дека викендот (недела) очекува севернокорејска делегација со цел да изврши увид во текот на подготовки за настап на женската уметничка група „Моранбонг“ на Игрите во Пјонгчанг. Девојките со статус на ѕвезди во најзатворената земја во светот се директно бирани од лидерот Ким Јонг Ун, оркестарот брои вкупно 140 члена и за нив се договорени два настапа кај јужниот сосед за време на Олимпијадата.
Самото присуството на Северна Кореја на Игрите во Јужна Кореја, настапот на нејзините спортисти, но и ангажманот на „Моранбонг“ се толкува како еден вид на дипломатски успех по повеќемесечните тензии севернокорејската нуклеарна и ракетна програма.
Зимските олимписки игри во Пјонгчанг ќе започнат на 9 февруари и ќе траат до 25 февруари.