Градоначалникот на Скопје Петре Шилегов најави дека ќе се отстрануваат бетонските бродови- галии од Вардар, кои се угостителски објекти.

-Бродовите во Вардар се водат како урбана опрема. Дадов налог да се направи анализа како да се отстранат со оглед дека две од нив веќе работат како угостителски објекти, вели градоначалникот Шилегов.

Како главна причина Шилегов ја наведе нивната небезбедност. Но во интервјуто за ТВ 24 во четвртокот Шилегов појасни дека таа нивна небезбедност, всушност претставува опасност за целиот град, во случај на надоаѓање на поголеми води, што може да придонесат за излевање на реката во Скопје.

-Тие се небезбедни затоа што претставуваат определен вид брана, во услови кога коритото на Вардар е проектирано за проточни води во наредните 100 години. Во случај на поголеми води, може водата да се излее во Скопје, изјави градоначалникот Шилегов.

Лани во мај надојдениот Вардар ги поплави самите галии -на едната галија која беше хотел водата беше до прозорците, а од галијата „Ројал“ со кофи се вадеше вода од внатрешноста на бродот. На приодите и под прозорците беа поставени вреќи со песок за да се спречи продорот на водата.

 

Одлуката за поставување на бродови во Вардар беше донесена во 2012 година, во времето на ексградоналникот Коце Трајановски.

Две од локациите за бродовите доби фирмата „ФалангаДИМ“, која со нив ќе стопанисува за нив 10 години и на Град Скопје ќе му плаќа кирија од 1.050 евра за едниот сплав, и 1.250 евра за другиот. Третата локации под концесија ја зема Стoјан Филиповски, сопственик на ресторанот „Воденица“.

Тие според договорот со Град Скопје требаше сами да ги изградат и да стопанисуваат со нив 10 години. Првата галија односно бродот „Ројал Македонија“ беше пуштен во употреба во јуни 2014 година. Бродот кој работи и како хотел на Филиповски почна со работа лани.