Во период од 10 години поранешната влада предводена од ВМРО-ДПМНЕ под ставката за привлекување странски иневеститори потрошила над 130 милиони евра, соопшти денеска владиниот портпарол Миле Бошњаковски.
„Анализата покажува дека овој столб од трошоците направени во изминатите 10 години е исклучително висок, нерационален и остава простор за многу идни анализи и истраги“, изјави Бошњаковски на прес-конференција во Владата.
Тој посочи дека поранешната влада потрошила над 31 милион евра за реклами во странски медиуми, а дополнително на ова, во домашните медиуми платила уште 12,5 милиони евра. Бошњаковски праша зошто биле плаќани милиони евра на македонските медиуми, на каков начин тие би можеле да привлекуваат странски инвестиции и за што им се исплатени 12,5 милиони евра.
За т.н. роуд шоуа, пак, министрите без ресор, заедно со поранешниот премиер потрошиле 5,6 милиони евра буџетски средства.
„Економските промотори чија улога никогаш не беше јавно и транспарентно објаснета и беше во конфликт со македонската дипломатија, ги чинеле граѓаните на Република Македонија цели 12,5 милиони евра“, рече Бошњаковски.
Според него, во овој дел на анализата особено се истакнува бројката за дополнителни приходи, станарини, закуп и друго, на министрите без ресор кои биле задолжени за странски инвестиции. Станува збор, како што кажа Бошњаковски, за сума од 2,8 милиони евра кои на министрите без ресор задолжени за странски инвестиции им биле исплатени како доплнителни бенифиции надвор од месечната бруто блата.
Бошњаковски појасни дека се работи за станарини, закупи, промотивни материјали,… во Македонија.
Одговорајќи на новинарско прашање, колкав е бенефитот од странските компании во земјава, посочи дека таа анализа е во изработка, но укажа дека сите договори што биле склучувани со странските инвеститори се декласифицирани и доколку се побараат тие информации од институциите, ќе и бидат достапни на јавноста.
Владиниот портпарол Миле Бошњаковски денеска го презентираше вториот дел од анализата за тоа колку поранешната влада потрошила во периодот од 10 години за привлекување странски директни инвестиции. Според претходно објавените податоци, станува збор за вкупно потрошени 225 милиони евра, за влез на 25 странски компании, кои оствариле 20.000 вработувања.