Јувентус по потврда, Монако по сензација во вечерашниот реванш меч во полуфиналето во Лигата на шампиони. „Старата дама“ одбројува до фудбалската пресметка во Торино со 2:0 од првата средба на „Луј Втори“ што ја прави фаворит за освојување на билет за големото финале на 3 јуни во Кардиф. „Кнезовите“, пак, пристигнаа на Апенините со намера да го расипат победничката атмосфера во најава. Свесни се дека ќе биде тешко, дека пропуштија прилика на домашен терен, но истовремено и самоуверени дека мисијата не е невозможна.
„Подготвени сме да одиграме добар меч. Ќе дадеме максимум за финале. Еден гол може да ја смени целата ситуација“, рече Леонардо Жардим, тренер на Монако, иако притоа призна дека француската Лига 1 и битката за шампионската титула со ПСЖ е приоритет број еден за наредниот период.
Португалецот истакна дека е горд на неговите фудбалери оти, како што рече, никој пред почетокот на натпреварите не очекувал од екипата да ја мине групната фаза.
„Нашата цел останува иста. Да нападнеме, да дадеме гол и да останеме со ладни глави иако доста се потрошивме викендот. Против Нанси бевме принудени да играме со најсилен состав што не беше случај со Јувентус против Торино. Но, без разлика ќе сториме се вечерашниот дуел да не биде последен во Лигата на шампиони за оваа сезона“, додаде Жардим.
Јувентус на своја страна, покрај резултатот од првата средба и поддршката од трибините, ја има и традицијата. Не против Монако или дуели со француски екипи туку севкупна во Лигата на шампиони. Само еден тим во историјата успеал да прокоцка победа од прв полуфинален натпревар во реванш. Тоа е Панатинаикос кој во сезоната 1995/96 славеше над Ајакс во Амстардам со 1:0, но загуби убедливо во Атина со 3:0.
„Монако нема што да загуби. Ние мора да играме и подобро од првата средба во која направивме и неколку грешки“, порача Масимилијано Алегри кој очекува од притивникот да нападне со сите сили со желба да внесе неизвесност во реваншот.
Кај Јувентус се враќа Сами Кедира кого во Кнежевството го менуваше Клаудио Маркизио. Опција за домашните вечерва не се повредените Ругани и Пјаца. Монако не може да смета на повредениот Бошилја додека неизвесни се Менди и Карилјо кои медиумите, сепак, ги вклучија во можните состави за дуелот на „Јуве Арена“.
Лига на шампиони – реванш полуфинале
Јувентус – Монако (резултат од прв меч 2:0)
Стадион: „Јуве арена“ во Торино. Капацитет: 41.507. Гл. судија: Бјорн Куиперс. Асистенти: Сандер ван Рокел и Ервин Зеинстра (сите тројца од Холандија).
Можни состави
Јувентус (формација 4-5-1): Буфон – Барзалји, Бонучи, Кјелни, Алекс Сандро – Пјаниќ, Кедира, Дани Алвеш, Дибала, Манџукиќ – Игуаин. Тренер: Масимилијано Алегри.
Монако (формација 4-4-2): Субашиќ – Менди, Џемерсон, Глик, Сидибе – Бернардо Силва, Фабињо, Бакајоко, Лемар – Мбапе, Фалкао. Тренер: Леонардо Жардим.