Реприза на успешните лански настапи во квалификаците за Лига Европа се желба на Шкендија и ова лето. Со, секако, едно дополнување за финалниот исчекор за место во групната фаза. „Црвено-црните“ во 2016 година ги нанижаа полска Краковија (2:0 и 2:1), Нефчи од Азербејџан (1:0 и 0:0) и чешка Млада Болеслав (2:0 и 0:1) пред да бидат елиминирани од белгискиот претставник Гент (0:4 и 1:2). Овојпат почнуваат против Дачија. Првиот меч е утре попладне (18 ч.) на стадионот „Младост“ во Струмица, реваншот е на 6 јули во Кишињев, Молдавија. Победникот во двомечот во наредната рунда ќе игра со подобриот од велшко-финската пресметка меѓу Конах и Хелсинки.
„Подготвени сме за предизвиците што нè очекуваат. Велам предизвици бидејќи верувам дека ќе останеме долго во Европа. Силно веруваме дека има сила во нас за резултат во првата средба што ќе значи и помирен реванш во Молдавија. Противникот е анализиран и може да кажам дека воопшто не е наивен. Имаме респект за екипата на Дачија, но и верба во нас дека можеме преку неа. Секако дека претставува хендикеп што не играме во Тетово меѓутоа и овде во Струмица очекувам полни трибини и поддршка од сите искрени вљубеници во фудбалската игра и, се разбира, нашите навивачи“, истакна Ќатип Османи, тренер на Шкендија.
Тетовци и оваа година во Австрија ја реализира главната фаза на подготовки пред настапите во Лига Европа. Македонскиот вицешампион паралелно со тренинзите одигра и три контролни меча против австрискиот нисколигаш Бад Радкерсбург, против хрватскиот прволигаш Интер Запрешиќ и против словенечки Марибор. Победник немаше во ниту еден, а сите завршија со идентичен резултат – 1:1.
Билетите за утрешниот натпревар во Струмица се веќе пуштени во продажба по цена од 200 денари. Правда ќе делат судии од Полска. За главен арбитар е делегиран Криштоф Јакублик, негови асистенти ќе бидат Марсин Борковски и Томаш Ниемировски.