Македонија заврши како шеста на младинското Светско ракометно првенство што завршува денеска во Алжир. Избраниците на Илија Темелковски загубија од Унгарија со 22:26 во натпревар за петтото место на мундијалот, но одличниот впечаток, и покрај пораз, сепак, останува.
„Црвено-жолтите“ имаа посакуван вовед во последниот настап на турнирот. Имаа игра, го имаа расположениот Томовски на голот, имаа и водство со 6:4 и 7:5 до средина на првото полувреме по што мечот навлезе во поинаков тек по нив. Унгарците ја презедоа контролата и со цврста игра во одбрана и ефикасен напад направија пресврт и на одмор заминаа со плус три (11:14).
Противникот продолжи во второто полувреме на начин со кој го заврши првото. До 38 минута нанижа три гола за 12:17 и го трасираше патот до конечен триумф пришто не застрани во ниту еден момент до истекот на 60 минута.
Нелоски беше најефикасен во „црвено-жолтата“ селекција со шест гола, Талески, Кузмановски и Танкоски постигнаа по четири. Прв стрелец на натпреварот беше Ковач со осум погодоци.
Македонија одигра вкупно девет средби во Алжир во кои забележа пет победи и четири порази. Во групната фаза ги совлада Русија (29:22), Буркина Фасо (48:20) и Бразил (28:23), а загуби од Шпанија (25:36) и од Тунис (27:32). Против домашната селекција, во осминафиналето, славеше со 24:20 по што дојде поразот од Франција во четврт-финалето со 17:33.
Потоа следуваше уште едно соочување со „зборнаја“, во разигрувањето за пласман од петто до осмо место, што повторно им припадна на македонските ракометари со 36:27 пред денешниот пораз од Унгарија (22:26).
За „црвено-жолтите“ ова беше второ учество на планетарните собири. Дебитантското го имаа во 2007 година на СП што се одржа во Македонија пришто беше освоено десеттото место.
Македонија – Унгарија 22:26 (11:14)
Спортска сала: „Омниспорт Хацене Харча“ во Алжир. Гледачи: 500. Судии: Амар Коњичанин и Дино Коњичанин (двајцата од БиХ).
Македонија: Томовски (18 одбрани), Даниловски (1 одбрана), Лазаревски, Димитриоски 1, Јагуриноски, Нелоски 6, Танкоски 4, Велковски 2, Шилегов 1, Петровски, Талески 4, Кузмановски 4, Крстевски, Џонов, Палевски, Арсеновски. Селектор: Илија Темелковски.
Седмерци: /. Исклучувања: 6 минути.
Унгарија: Росаволѓи (8 одбрани), Паштор (11 одбрани), Молнар 1, Фекете, Варју 2, Уборњак 1, Сакали 1, Фузи, Шмид 3, Лигетвари 3, Ковач 8, Сита, Габор, Тот 1, Ѓери 2, Торок 4. Селектор: Јањош Ѓурка.
Седмерци: 4/5. Исклучувања: 10 минути.