Македонија зачекори кон главната квалификациска фаза за Светското кошаркарско првенство во Кина во 2019 година. Националниот тим го совлада Косово со 87:74 што значеше и потиснување на вечерашниот ривал на последното место на табелата, поради подобар меѓусебен скор, на натпревар до крајот во претквалификациската група Ц.
Победникот во арената „Борис Трајковски“ беше решен во третиот период. „Црвено-жолтите“ го решија во своја корист со 23:13 за кршење на отпорот на гостите што го задаваа во првиот дел. Косовските кошаркари ги добија воведните 10 минути од средбата со 19:22 во желба, веројатно, да покажат дека не се дојдени со бело знаме и дека онаа победа во Приштина не беше остварена, во голема мера, на крилја на поддршката од трибините.
Но, домашните успеаја навреме да се „разбудат“, да ја преземат контролата во натпреварот за конечна реализација на примарната цел во циклусот. Беа подобар ривал во наредните три четвртини (21:19, 23:13, 24:20) за растоварување на дел од притисокот пред гостувањето кај Естонците во среда попладне од 17.30 часот.
Бледиот впечаток, сепак, останува дека мораше многу подобро и на Косово и на домашен терен против Естонците иако претквалификациите, со вечерашниот триумф, конечно одат во посакуван правец. За комплетирање на мисијата е потребна победа и во Талин додека во случај на пораз ќе биде потребен и триумф на Естонија во Приштина за повлекување на „црвено-жолтите“ во квалификациите за СП 2019.
Прв стрелец во реваншот со Косовците беше Џордан Теодор со 24 поени, Костоски додаде 16, а Војдан Стојановски 14. Најефикасни кај поразената репрезентација беа Фисник Ругова со 17, Скот Бамфорт со 15 и Дардан Бериша со 11 коша.
Македонија – Косово 87:74
По четвртини: 19:22, 21:19, 23:13, 24:20. Арена: „Борис Трајковски“ во Скопје. Гледачи: 500. Судии: Толга Сахин (Италија), Мариуш Циулин (Романија), Дариуш Заполски (Полска).
Македонија: Николовски 2, Стајиќ 2, Јанески, Мекиќ, Костоски 16, В. Стојановски 14, Тасовски 4, Ѓуроски 5, Брчков, Чековски 8, Теодор 24, Младеновски 12. Селектор: Јорданчо Давитков.
Косово: Кастрати 3, Весели 6, Г. Ругова 6, Бериша 11, Хајризи, Зенелај, Бамфорт 15, Сина, Шоши 9, Морина 5, Ф. Ругова 17, Мекај 2. Селектор: Бред Гринберг.
Кошарка/претквалификации за СП 2019
Група А
Словачка – Ерменија 78:92
БиХ – Шведска 72:88
Табела: Ерменија 7, Шведска 6, БиХ 6, Словачка 5.
Група Б
Австрија – Албанија 97:63
Табела: Австрија 5, Холандија 4, Албанија 3.
Група Ц
Македонија – Косово 87:74
Табела: Естонија 4, Македонија 4, Косово 4.
Група Д
Бугарија – Португалија 91:65
Табела: Бугарија 6, Белорусија 3, Португалија 3.