Политички говор со делумно спортски примеси на американскиот претседател Доналд Трамп во Алабама. Првиот човек во Белата куќа со порака до газдите на НФЛ клубовите (американски фудбал) да не дозволат настап или да ги отпуштат играчите кои ќе одбијат да стојат за време на интонирање на химната.
„Горди сме на нашата земја, го почитуваме нашето знаме. Дали не сакате да видите некој сопственик на НФЛ клуб кој ќе рече „Извади го тој кучкин син од терен. Надвор. Тој е отпуштен“ за некој кој ќе искаже непочитување на нашата химна и знаме“, рече Трамп пред присутните во Алабама кои, пак, на претседателскиот патриотизам возвратија со скандирање „САД, САД“.
Во основа на таквиот говор на Трамп беше реакцијата на Колин Кеперник, квотербек на Сан Франциско, од минатата сезона кој одби да стои на химната на САД поради проблеми со расното прашање во земјата. Во таа прилика тој клекна на едно колено, пример за изразување на незадоволство што потоа го следеа и други негови колеги.
„Нема да стојам на химната и на тој начин да изразувам почит кон знамето на земјата што угнетува црнци и луѓе со друга боја на кожа“, истакна Кеперник лани во период во кој на улици во градовите, воглавно на југот, се случуваа убиства на Афроамериканци.
За Трамп тоа е недозволиво и ако некој газда на клуб реши да отпушти фудбалер што ќе изрази непочитување на националните обележја ќе стане најпопуларен човек во земјата.
На говорот на претседателот на САД следуваа реакции од фудбалери кои порачаа дека Трамп треба да се бави со политика наместо со спорт.
„Дали некој му рекол на Трамп да се држи до политиката како што нас ни е кажано да се држиме до спортот“, напиша Ерик Ебдон на својот Твитер профил.
Трамп, притоа, се обрати и до гледачите кои одат на стадион порачувајќи им веднаш да станат и да ја напуштат трибината што видат фудбалер што клечи за време на химна.
„Заминете. Ви гарантирам дека таквиот тренд ќе престане. Едноставно соберете се и излезете“, сугерира Трамп.