Шпанската влада ја отфрли декларацијата за независност што вчера на говорницата на каталонскиот парламент ја потпиша каталонскиот лидер Карлес Пучдемонт и воедно го отфрли повикот за посредништво во преговорите.
Вицепремиерката на Шпанија Сораја Саeнс де Сантамарија изјави дека Пучдемон не знае каде се наоѓа и каде оди, коментирајќи го потегот на каталонскиот лидер, кој веднаш по прогласувањето независност, ја суспендира оваа одлука.
-Денешниот говор на претседателот на Каталонија е говор на човек кој не знае каде се нбаоѓа, каде оди, ниту со кого сака да оди таму. Ниту г-дин Пучдемон ниту некој друг може да наметне посредништво. Откако ја донесе Каталонија до најголемите тензии во својата историја, претседателот Пучдемон сега го доведе својот автономен регион до највисокото ниво на несигурност, рече таа.
За денеска е закажана вонредна седница на шпанската влада на која ќе се разговара за одговорот на каталонската одлука.
Пучдемон потпиша синоќа декларација за независност на Каталонија од Шпанија, која потоа ја суспендира, нарекувајќи го чин на одговорност, со што се остава простор за преговори со централните власти.
Во документот се наведува дека се формира „Република Каталонија како независна, суверена и правна држава“.
Обраќајќи се до каталонскиот парламент во Барселона, Пучдемон рече дека автономниот регион добил право да биде независен како резултат на гласањето.
-Ги повикуваме меѓународните држави и организации да ја признаат каталонската република како независна и суверена држава, рече тој.
Тој додаде дека “народната волја” е отцепување од Мадрид, но, истакна дека целта е сепат да се намалат тензиите околу ова прашање.
-Предлагам суспендирање на ефектите од прогласувањето независност за да превземат разговори во наредните недели, без што не е можно да се постигне договорено решение, рече Пучдемонт пред пратениците.
Поддржувачите на независноста кои беа собрани пред Парламентот во Барселона го поздравија ставот на Пучдемон, но видно беа разочарани од конечниот став.
Речиси 90 отсто од гласачите на референдумот на 1 октомври ја поддржаа независноста со одѕив од 43 отсто. Гласачите кои беа против во голема мерка го бојкотираа гласањето.Националната полиција употреби сила за да го спречи одржувањето на референдумот, а светот беше сведок на сцени на исклучително насилство.
Пред обраќањето на Пучдемон влера, влијателни личности, меѓу кои градоначалникот на Барселона, Ада Колау и претседателот на Европскиот совет, Доналд Туск, го повикаа да се откаже од прогласувањето независност.
Каталонија е еден од најбогатите региони во Шпанија, но по референдумот, многу компании објавија дека ги повлекуваат своите седишта од Каталонија, како одговор на кризата.
Европската унија јасно стави до знаење дека ако Каталонија се оддели од Шпанија, регионот ќе престане да биде дел од ЕУ.