Стефан Богоев е еден од најмладите кандидати за градоначалник на локалните избори во 2017 година. Тој има 28 години и ќе се бори за градоначалничкото место во општината Карпош, каде противкандидат му е актуелниот градоначалник од партијата ГРОМ, Стевчо Јакимовски.
Стефан Богоев веќе два мандати е пратеник во Собранието на Република Македонија. Тој за прв пат влезе во законодавниот дом по изборите во 2014 година, а потоа повторно беше избран за пратеник на предвремените парламентарни избори во 2016 година.
Го прашавме зошто решил да го прифати предизвикот и да му пркоси на Јакимовски за прв човек на Карпош.
„Затоа што тука планирам да останам да живеам, тука сакам да оформам семејство. Имам идеи, имам визии и знам како на Карпош и заедно со карпошани да си го вратиме достоинството, да си го вратиме воздухот, да си ја вратиме и да ја унапредиме животната околина. Затоа, наместо комотно да седам во Собрание, решив сите овие идеи да ги исканализирам и да ги ставам на увид на моите сограѓани, да влезам во оваа борба беспоштедно за враќање на животот во Карпош. И знам дека заедно со карпошани ќе успееме да си ја вратиме општината“, вели Богоев.
На локалните избори на 15 октомври, Богоев на карпошани им ветува: Екопаркизни за чист Карпош, картичка „Мој Карпош“ со која ќе се овозможат повеќе пари за граѓаните, Рекреативен центар за пензионери и пензионерски дом, нов зелен парк во Карпош 4 на површина од 80.000 м2, три реонски базени, страт – ап центри за намалување на младинската невработеност…
https://www.facebook.com/bogoevstefan/videos/1419215194863407/
Претстојните локални избори според него се „финалната фаза на демонтирањето на режимот кој што повеќе од една деценија ја урнисуваше Македонија, а во Општина Карпош, Стевчо Јакимовски е последниот остаток од режимот на Груевски, со иста матрица на владеење“.
На прашањето зошто карпошани да не гласаат за Стевчо Јакимовски, туку гласот да го дадат за Стефан Богоев. Кандидатот на СДСМ за НОВА ТВ одговори:
„ Од аспект на локалната самоуправа и животот во Карпош, во времето на владеењето на Јакимовски како низ нашите маала да поминал квазиурбан бетонски цунами. Од една чиста, зелена и урбана средина, Карпош го претвори во општина – монструм: со енормно загаден воздух; со зеленило кое што секојдневно исчезнуваше пред нашите очи и буквално е избришано со гумичка; место каде што градежната мафија им го узурпира правото на достоинствен живот на карпошани; каде што урбанистичките планови се кроени по мерка, ама не за карпошани, туку за приватни профити; место каде што три сантиметри асфалт се претставуваат како врвно градоначалничко достигнување, а не како дел од вообичаената секојдневна работа на првиот човек на една општина…“, изјави Богоев.
Стевчо Јакимовски не излезе ниту еднаш на телевизиско соочување со својот противкандидат. На дебатите во медиумите, каде кандидатите требаше да ги соочат своите програми, се појави само предизвикувачот Стефан Богоев.
Богоев е претседател на Социјалдемократската младина и ја претставува новата генерација македонски политичари. Освен како еден од најактивните критичари на претходната власт од собраниската говорница, тој беше активен и на протестите на „Шарената револуција“. Тој е дипломиран економист, магистрант на применета економија, Универзитет Американ колеџ – Скопје.