30 дневен притвор определил јавен обвинител од ОЈО за четворица лицата кои вчера беа приведени за насилството во Собрание и за нападот на пратеникот Зијадин Села, соопштија од Јавното обвинителство.
Овие лица се под истрага за делото „Убиство во обид сторено во соизвршителство“.
За петтото лице за кое обвинителството исто така предложи определување на мерка притвор, но поради влошена здравствена состојба судот дополнително ќе одлучи.
Постапката што се води против овие лица се однесува на настаните во Собранието на Република Македонија од 27 април и нападот врз Зијадин Села.
Андреј Мицов (22), Никола Војминовски (39), Александар Јаневски – Тошта (57), Коста Делов (26) и Стојан Павлески – Кобра (51) се уапсените по наредба на Основното јавното обвинителство – Скопје за крвничкиот напад на Зијадин Села, дознава НОВА ТВ од извори од истрагата. Засега пртивор не е определен само за Александар Јаневски – Тошта кому вчера за време на распитот во полициската станица му се слошило и бил пренесен на кардиологија.
Јаневски – Тошта по крвавиот четврток изјави дека тој не го нападнал пратеникот Зијадин Села, туку дека помогнал да го извадат од толпата. Тошта на денот на локалните избори завчера, кога се чекаа резултатите беше во штабот на ВМРО-ДПМНЕ. Тој е претседател на општинскиот огранок од Кисела Вода на здружението „Гардист 2001“ и претседател на Кинолошкото друштво Скопје.
Коста Делов самиот призна дека учествувал во тепањето на Села и заедно со Никола Војминовски уште во мај беа повикани на разговор за настаните што се случија на 27 април во Собранието, но беа ослободени.
„Чувството кога брутално си го тепал Зијадин Села со клоци по глава, бесценето“, напиша Коста Делов на својот Фејсбук профил по настаните во Собранието.
Најмладиот, Андреј Мицов, исто така на Фејсбук објавуваше слики со качулка во Собранието на 27 април.
За обидот за убиство на Села, пред неколку месеци беа уапсени и обвинети Кире Ѓоргиевски и неговиот татко и тие се наоѓаат во истражниот затвор Шутка.
Во текот на вчерашниот ден Јавното обвинителство објави фотографии од тројца учесници во насилството и побара помош за нивно пронаоѓање. Доцна вечерта, сите три лица беа приведени.