Пратеникот Зијадин Села денеска во сведочењето пред судот за обидот за убиство изјави дека за време на насилствата во Собранието бил удиран во главата со монитор, копје од знаме и со даска.
Во присуство десетимината обвинети тој рече дека бил зашеметен и дезориентиран, поради што не се сеќава на дел од настаните на 27-ми април.
Тој додаде дека за време на нападот постојано со камера го снимала новинарка која зборувала со еден од напаѓачите, кој пак носел фантомка на главата и маица со број 6 и која го предупредила: „Сега ќе видите што ќе ви се случи“.
-Уште пред да влезе толпата, внатре со Рушити и Мемеди зборевме дали да се качиме во канцеларија или да одиме во прес салата. Кога тргнавме кон кацеларија пред нас застана „новинарката“, односно не знам што е точно по професија, инаку таа е личноста која цело време ме снимаше. Ми рече: „Никаде нема да одите, сега ќе видите што ќе ви се случи“, потсети Села и како што додаде него не му дозволувала културата да ја тргне од патот, па во тој момент се вратиле и влегле во прес салата.
Од нејзината снимка, рече тој, би можел да се види целиот напад.
Одговарајќи на прашање на обвинителот, Села рече дека не се сеќава на ликовите на напаѓачите.
– Ова треба да го утврди истрагата. Не е можно од сите напади да има снимка, само од мојот напад да нема. Не е можно при толку телефони, мојот напад да не бил снимен, рече Села.
Села истакна дека пред да бида нападнат добил директни закани за неговиот живот. Како што рече тој слушнал како некој извикува: „Еве го Села, каде ќе одиш, ќе те убиеме“.
-Последниот момент што го паметам е како паднав на колена и тогаш почнаа да ме удираат по глава и насекаде по телото. Пред да паднам, човек со кожно елече и со очила на главата рече „Еве го Села, ајде!“ , рече Села.
Тој рече дека не ги познава луѓето кои го нападнале. Пред него како жив штит стоеле пратениците Сурија Рушити од Алијансата за Албанците и Реџаил Исмаили од ДУИ. Во еден момент се повлекле и го оставиле сам очи во очи со насилниците. Тогаш Села добил удари со тупаници и клоци.
На прашањето на обвинителот, дали некој се обидел да го одбрани, Села рече:
-Кога ги добив ударите од мониторот, копјето и даската без зашеметен и дезориентиран и не се сеќавам на се. Кога се повлекоа пратениците останав сам без одбрана, обезбедувањето се обидуваше да го одбрани Заев. Никој во толпата не се обиде да ми помогне мене. Ако ми помогнеше некој тогаш, ќе бев испратен со цвеќиња и аплауз, а не со тешки повреди, рече Села во сведочењето.
Притоа нагласи дека изгубил свест и се разбудил во болница.
– Се освестив во соба 334 во Собранието. Собата беше темна, а јас бев под бирото. Абдул Фета, вработен во собрание беше со мене и ми се претстави, а со него беше и друго лице. Фета ми кажа дека телефонот постојано ми звони и го земав и се јавив на сопругата и и кажав дека сум жив. Тогаш влегоа полицајци во цивилка. Ми облекоа дуксер и ми дадоа полициска значка, буквално ме маскираа. Ме изнесуваа викајќи повреден полицаец, повреден полицаец, рече Села.
По излегувањето од судот, тој обвини дека зад настаните што се случија во Собранието стојат политичари и политички партии.
– За да не ни се повтори вакво нешто, судот би требало да ги казни учесниците. Мислам дека зад целата оваа работа стои добро организирана шема од страна на одредени политичари и политички партии, рече Села, додавајќи дека денеска во судницата ги препознал напаѓачите.
Оливер Ошавковски, Сашо Сенков, Николче Димитриевски, Александар Јаневски-Тошта, Андреј Мицов, Никола Војминовски, Коста Делов, Стојан Павлески – Кобра, како и Кире Ѓоргиевски и неговиот таткосе обвинети за обид за убиство на Села. Последните двајца беа уапсени во мај лани, како осомничени за физички напад и влечење на Села кој потоа во критична состојба заврши во болница.
Како што изјави обвинителот на едно од минатите рочишта, единствена причина поради која Села преживел, е што тепачите мислеле дека е веќе мртов.
Адвокатот на Села на минатото рочиште рече дека од обвинетите бараат 500.000 евра – материјални трошоци за лекување и нематеријални за претрпената физичка и душевна болка и повреда на личниот интегритет.