По две недели пауза, Собранието денеска одржа пленарна седница на која пратениците гласаа за осум закони по скратена постапка, но со потешкотии во обезбедувањето на кворум бидејќи пратениците на ВМРО-ДПМНЕ и покрај координациите одлучија и понатаму да ја бојкотираат работата на законодавниот дом.
За време на седницата, претседателот на Собранието, Талат Џафери неколку пати имаше проблем да обезбеди кворум на присутни пратеници па во 12.20 часот даде пауза до 13 часот и коордиторите на пратеничките групи ги повика кај него на координација.
Но и по паузата, во Собранието повторно немаше доволен број на пратеници, бидејќи фалеа дел од пратениците на ДУИ.
-Ејуп каде ти се пратениците? Вие сте координатори, треба да ги координирате пратениците. Ако не можете да си ја вршите работата треба да кажете, му се обрати Џафери директно на координаторот на ДУИ, Ејуп Алими.
Пратеникот на ДУИ, Артан Груби, пак, ја обвини опозициската Беса за тоа што Собранието работи на раб на кворум.
– Жалам што пратениците на Беса не дојдоа и не овозможија работа на Комисијата за избори и именувања за да се изгласа Насер Ајдини за уставен судија и со тоа са се комплетира Уставниот суд, како и да се изберат два члена во Советот на обвинители. Пратениците на Беса ги нема и на пленарна седница за да гласаат за измени на Законот за градба со што ќе се овозможи да се уреди граничниот премин Беланице-Станчиќ. Беса само декларативно се залага за реформи, а всушност ги кочи процесите, рече Груби во собранискиот прес центар.
Груби смета дека власта е конструктивна и оти добро течат преговорите на работните групи меѓу ВМРО-ДПМНЕ И СДСМ за реформските закони, особено за Законот за заштита ба сведоци. Тој повторно ја повика ВМРО-ДПМНЕ да се откаже од 35.000 амандмани, да се врати во Собранието и да си го смени однесувањето.
Пратениците пред паузата по скратена постапка ги изгласаа изменувањата и дополнувањата на законите за пензиското и инвалидското осигурување, на Изборниот законик, на Законот за градење, на Законот за вработените во јавниот сектор, на Законот за Управата за јавни приходи, на Законот за придонеси од задолжително социјално осигурување, на Законот за даночна постапка и на Законот за сигурност во железничкиот систем.