Италијанците тргнуваат по стапки на Англичаните за дел од фудбалската сезона. И тие од сезоната 2018/19 ќе применат нешто што со години е традиција на Островот. На Апенините се воведува т.н. „Боксинг Деј“, но и многу други радикални новитети во Серија А што ги најави Џовани Малаго, претседател на олимпискиот комитет на Италија.
„Наредната сезона во Серија А ќе почне на 19 август, италијанскиот Суперкуп е планиран за 12 август. Местото на одигрување ќе биде дополнително одредено. Во текот на првенството ќе има две кола среде работна недела, првото на 26 септември, второто на 3 април. Одобривме и формула за „Боксинг Деј“ со натпревари на 22 и на 26 декември по што ќе следува пауза до 20 јануари“, истакна Малаго.
Сезоната како што најави Малаго ќе почне на 19 август и ќе трае до 26 мај во 2019 година. Не е предвидена класична зимска пауза, а преодниот рок ќе заврши на 18 август на ден до почеток на шампионатот.
„На 13 јануари се планирани мечеви во Купот на Италија, натпреварување чиј формат, исто така, ќе претрпи промени. Клубовите со подобар коефициент повеќе нема да мора да бидат домаќини туку и тоа ќе се одредува со ждрепка. Измени направивме и кај трансферите. Летниот преоден рок ќе заврши на 18 август, зимскиот на 19 јануари“, заклучи првиот човек на италијанскиот олимписки комитет.
Серија А, според форматот, во многу нешта во иднина ќе потсетува на Премиерлигата, а со ваквите најави се чини дека на челниците на италијанскиот фудбалски сојуз им се допаѓа моделот на натпревари од англиската фудбалска елита.