Почина полицаецот кој беше тешко повреден во вчерашниот терористички напад на југот на Франција, соопшти францускиот министер за внатрешни работи, Жерар Колон.
Четириесет и петгодишниот полицаец Арно Белтрам му се предаде на киднаперот во замена за ослободување на заложниците.
„Франција никогаш нема да го заборави неговото херојство, неговата храброст, неговата жртва“, напиша Колон на Твитер.
Францускиот претседател, Емануел Макрон претходно изјави дека Белтрам „спаси животи и служи на чест на нашата војска и нашата земја“.
Вчера во југозападна Франција три лица беа убиени во серија напади, кога напаѓачот првин одзеде возило во градот Каркасон усмртувајќи едно лице и ранувајќи две други, а потоа зеде заложници во супермаркет во градот Треб, извикувајќи „Алах Акбар“.
Одговорноста за нападот ја презеде терористичката организација Исламска држава.
Напаѓачот, 26-годишниот Редван Лакдим, од претходно и бил познат на полицијата за поситни прекршувања на законите.
– Го следевме и сметавме дека не е радикализиран, но тој ненадејно презеде акција – изјави вчера Колон на прес-конференција во Треб.
Киднаперот бил неутрализиран од страна на припадници на полицијата кои упаднале во супермаркетот.
Напаѓачот, кој тврдел дека е припадник на џихадистичката група Исламска држава, вчера претпладне упадна во супермаркетот убивајќи две лица и задржувајќи тројца заложници. Набрзо тој ги ослободи заложниците и заедно со потполковникот на француската жандармерија, кој се јави доброволно да замени еден од заложниците, остана сам во супермаркетот. Тој двапати го застрелал Арно Белтрам и му задал повеќе удари со нож.
Потполковникот цело време го држел отворен својот мобилен телефон, што и помогнало на полицијата да ја следи состојбата во супермаркетот.