Фудбалска реминисценција во Хрватска. „Коцкестата“ репрезентација по цели две децении ќе игра полуфинале на Светско првенство. Избраниците на Златко Далиќ вечерва ја елиминираа Русија за комплетирање на големата четворка на мундијалот. Влезот во неа беше поплочен на идентичен начин како и во осминафиналето против Данска – на пенали. И Хрватите и Русите постигнаа по гол во основниот дел (1:1) од пресметката во олимписко Сочи, и Хрватите и Русите постигнаа по гол во двете продолженија (2:2), но Хрватите постигнаа еден повеќе од Русите во серијата удари од белата точка или ако сакате Русите промашија еден повеќе.
Серијата голови на стадионот „Фишт“ на брегот на Црното море ја отворија и затворија фудбалерите на „зборнаја“. Денис Черишев со прекрасен погодок од 20. метри во 31. минута обезбеди водство за домаќинот на СП 2018 на што одговори Андреј Крамариќ во 39. минута за израмнување на Хрватите на 1:1, резултат што остана непроменет до истекот на 90. минута. „Коцкестите“ порешително влегоа во продолженијата, а последица на таквиот нивни пристап беше голот на Домагој Вида во 101. минута за 2:1.
https://www.youtube.com/watch?v=1W5kGC0idVY
Стекнатата предност на Хрватите на терен ги крена на нозе нивните навивачи на трибините. Имуна во ситуацијата не остана ниту хрватската претседателка Колинда Грабар-Китаровиќ која голот на Вида го прослави со танц во свечената ложа во која беше во друштво на првиот човек на ФИФА, Џани Инфантино и рускиот премиер, Дмитри Медведев.
Русите ја прифатија фрлената ракавица и со сите сили тргнаа по втор погодок што дочекаа да го прослават во 115. минута. Џагоев нафрли, Фернандез со глава го совлада Субашиќ и го одведе мечот до изведување на пенали. Брозовиќ, Модриќ, Вида и Ракитиќ беа сигурни егзекутори од белата точка за Хрватска за која промаши единствено Матео Ковачиќ. Алан Џагоев, Сергеј Игнашевич и Далер Кузјаев реализираа за руската репрезентација, но не и Федор Смолов и човекот што ги осигура пеналите, Марио Фернандес.
Ривал на Хрватска во полуфиналето во среда (20 ч.) на стадионот „Лужники“ во Москва ќе биде Англија чија селекција со 2:0 во четврт-финалето славеше над Шведска.
Русија – Хрватска 1:1 (1:1); по продолженија 2:2; на пенали 3:4
Стадион: „Фишт“ во Сочи. Гледачи: 44.287. Гл. судија: Сандро Ричи. Асистенти: Емерсон де Карвалјо и Марсело ван Гасе. Ж. картони: Ѕјуба, Газински (Русија); Стриниќ, Вида, Ловрен (Хрватска). Стрелци: Черишев 31’, Фернандес 115’ за Русија; Крамариќ 39’, Вида 101’ за Хрватска.
Русија (формација 4-2-3-1): Акинфеев – Кудрјашов, Игнашевич, Кутепов, Фернандес – Кузјаев, Зобнин – Черишев (Смолов 67’), Самедов (Ерохин 54’), Головин (Џагоев 102’) – Ѕјуба (Газински 79’). Селектор: Станислав Черчесов.
Хрватска (формација 4-2-3-1): Субашиќ – Стриниќ (Пивариќ 74’), Вида, Ловрен, Врсаљко (Чорлука 97’) – Ракитиќ, Модриќ – Перишиќ (Брозовиќ 63’), Крамариќ (Ковачиќ 88’), Ребиќ – Манџукиќ. Селектор: Златко Далиќ.
Четврт-финале
Русија – Хрватска 1:1 (1:1); по продолженија 2:2; на пенали 3:4
Шведска – Англија 0:2
Бразил – Белгија 1:2
Уругвај – Франција 0:2
Двојки за полуфинале
Франција – Белгија (вторник, 20 ч., Санкт Петербург)
Хрватска – Англија (среда, 20 ч., Москва)