Собранието на Република Македонија синоќа не одржа седница како што беше најавено од кабинетот на претседателот Талат Џафери, на која треба да се спроведе договореното на лидерската средба за Законот за финансирање политички партии, за Законот за Влада и за избор на членови на ДИК.
Собраниската Комисија за прашања на изборите и именувањата вчера по лидерската средба ја почна постапката за избор на членови на ДИК со доставување на списокот кандидати кои се пријавија на огласот, до претседателот на Собранието Џафери, кој пак побара од партиите да се изјаснат кои кандидати ќе ги поссржат.
До полноќ иако најавуваа, формално, список со свои кандидати до кабинетот на Џафери не доставила опозициската ВМРО-ДПМНЕ со што не можеше да продолжи постапката за избор на членови на ДИК која треба да го спроведе референдумот за Договорот со Грција.
Според информациите од Собранието, причина за ова е неможноста работните групи на парламентарните партии до крај да се договорот за одредени членови што треба да се менуваат во Законот за финансирање на политичките партии и во Законот за Влада.
Официјално, никој од партиите не соопштува зошто не се одржа седница за да се изгласа она што беше договорено на лидерската средба.
Засега нема најава како и кога ќе продолжи постапката. Се очекува разговорите за усогласување да продолжат, работните групи да завршат со работа за да може Џафери да закаже седница.
По договорот на лидерската средба, до СОбранието веќе бил испратен списокот за состав на ДИК. ВМРО ДПМНЕ го предлага Оливер Дерковски за претседател, а за член Елизабета Постоловска.
Препрека е референдумското прашање
По вчерашната лидерска средба, премиерот Зоран Заев изјави дека иако нема договор за референдумот, ќе се почитува договореното за законите за влада односно и за финансирање на партиите, како и за изборот на ДИК.
Лидерите на СДСМ, ВМРО-ДПМНЕ, ДУИ и Беса вчера не се договорија за референдумот.
Главните разлики меѓу владеачките партии и опозициската ВМРО-ДПМНЕ според лидерот на оваа партија Христијан Мицкоски биле околу референдумското прашање. Ставот на ВМРО-ДПМНЕ, според него, е дека референдумското прашање мора да биде еднозначно, онака како што предвидува Законот.
-Не можеме, додаде тој, да се согласиме со прашање со повеќе значења. Прашањето треба да се однесува само на договорот, изјави Мицкоски по средбата.
– Позицијата ги бранеше државните интереси. Разликите се во прашањето кое што треба да се постави на референдумот. Се разбира дека нормалниот тек на референдумот зависи и од прашањето кое што ќе го поставите. Во овој случај сакам да истакнам дека сите ние треба да ги ставиме државните интереси пред партиските интереси. И сметам дека во оваа ситуација опозицијата треба да ги стави пред се државните интереси – изјави лидерот на ДУИ Али Ахмети.