Основното јавно обвинителство Скопје денеска поднесе Обвинителен акт против две лица за убиство на Никола Саздовски, што се случи на 29 јуни.
За третиот осомничен истражната постапка е прекината, бидејќи е недостапен за органите на прогонот и ќе продолжи откако тој ќе биде најден.
Според обвинението тие на свиреп начин го лишиле од живот Саздовски. Исто така на двајцата обвинети им е продолжена мерката притвор, бидејќи се смета дека постои опасност од бегство и дека во текот на кривичната постапка обвинетите ќе влијаат на сведоците.
-Обвинетите на 29 јуни 2018 година околу 17.45 часот на бул. Александар Македонски во Скопје, на автобуската постојка пред фабриката Алкалоид, му пристапиле на оштетениот и му побарале лична карта. Откако оштетениот им ја покажал личната карта, обвинетите неочекувано започнале заедно истовремено да го удираат со боксови во пределот на главата и градите. Од силните удари оштетениот загубил рамнотежа, паднал на тротоарот, по што обвинетите без милост, истовремено и со силни удари продолжиле со клоци да го удираат по главата и градите. Од ударите оштетениот се здобил со тешки телесни повреди со конкретна опасност по животот и западнал во коматозна состојба. Тој бил пренесен во ургентниот центар при Клиничкиот центар Мајка Тереза. Истиот ден бил пренесен во Јавната здравствена установа Универзитетска клиника за трауматологија, ортопедски болести, анестезија, реанимација и интензивно лекување и ургентен центар – Скопје , Одделение за анестезија и реанимација, каде на 3 јули 2018 година била констатирана мозочна смрт. Како резултата на здобиените повреди на 9 јули 2018 година оштетениот починал, се вели во соопштението од ОЈО.
Од Обвинителството појаснуваат дека обвинителниот акт следи по спроведена истражна постапка против двајцата обвинети за кривичното дело за кое што се обвинуваат. Во текот на истражната постапка обвинетите биле испитани и дале своја одбрана пред надлежен јавен обвинител.
Против третото осомничено лице, Јетон Љужа за кое обвинителството исто така водеше истражна постапка за истото кривично дело како соизвршител заедно со двајцата сега обвинети,Обвинителството соопшти дека е прекината истражната постапка и же продолжи кога тој ќе биде достапен за органите на прогонот. По него е распишана домашна и меѓународна потерница.