Илјадници луѓе денеска протестираа ширум Русија поради планот на Владата за зголемување на старосната граница за пензионирање за пет години.
Неколку илјади луѓе учествуваа на собирот во Москва во организација на Комунистичката партија и други левичарски групи. Протести имаше и во другите градови во сите 11 руски временски зони.
Планот на руската Влада за зголемување на старосната граница за пензионирање за мажите на 65 години, а за жените на 60 години, наиде на незадоволство како кај постарите така и кај младите Руси. Повозрасните стравуваат дека нема да доживеат пензија додека младите наведуваат оти подолгиот работен век ќе ги ограничи нивните шанси за вработување.
Предлогот влијаеше и на падот на популарноста на претседателот Владимир Путин, кој истакна дека е неопходно зголемување на старосната граница за пензионирање.