Путин и Трамп, сепак, имаа блиц средба во Буенос Аирес

Претседателите на Русија и на САД, Владимир Путин и Доналд Трамп, сепак, имаa куса средба на маргините на Самитот на Г-20 во Аргентина, изјави денеска советник во Кремљ, Јуриј Ушаков.

Ушаков додаде дека и тој се сретнал со советникот на Трамп за национална безбедност Џон Болтон.

„Русија и САД се подготвени да ги продолжат контактите“, наведе Ушаков, но посочи дека „не е сигурен кога би можело да биде одржан нов состанок меѓу Путин и Трамп“.

Американскиот претседател вчера изјави дека решил да ја откаже планираната средба со неговиот руски колега Владимир Путин на маргините на Самитот на Г-20 во Буенос Аирес, поради инцидентот со украинските бродови во близината на Крим.