Поранешниот вицепремиер на СР Југославија, министер за надворешни работи на државната заедница Србија и Црна Гора и актуелен лидер на Српското движење за обнова (СПО), Вук Драшковиќ изјави дека „војната со НАТО во 1999 година ќе се избегнеше доколку се потпиша договорот во Рамбује за Косово“.
„Доколку Милошевиќ ја прифатеше првата верзија од понудениот договор, Албанците ќе ја одбиеја и ќе беа притиснати од Западот се додека не ја прифатеа. Но, Милошевиќ го одби договорот“, изјави Драшковиќ за весникот „Блиц“ по повод одбележувањето на 20-годишнината од воздушните напади на НАТО врз поранешна СР Југославија.
Драшковиќ наведува дека косовските Албанци попуштиле бидејќи не сакале „да бидат пречка за бомбардирањето“ по што во Белград дошол американскиот дипломат Ричард Холбрук, кој на Милошевиќ му нудел „писмени гаранции дека Косово ќе остане во Србија“.
„Тој го одби тоа, по што Холбрук го праша: Знаете ли што следува? – Милошевиќ ладнокрвно му одговори: Знам, следуваат НАТО бомбите“, изјави Драшковиќ.
Според него, Милошевиќ не сакал да биде постигнат договор туку „само глумел дека го сака тоа“. Драшковиќ оценува дека немало да се случат нападите на НАТО доколку во Рамбује бил потпишан договор.
„Едно е сигурно. Немаше да има бомбардирање на НАТО и веројатно Косово денес ќе имаше статус на автономија, а не статус на независна држава“, истакнува Драшковиќ.
Запрашан дали подоцна дознал нешто за тој период и за војната, а што не го знаел во тоа време, Драшковиќ одговара дека не знаел оти биле убивани албански цивили и нивите тела биле „тајно носени во Србија и тајно погребувани во полициските бази во Белград, во реките и во езерата“.