Вечерашниот тренинг на македонската ракометна репрезентација во СЦ „Борис Трајковски“ го даде одговорот за последните четворица прекубројни за претстојниот дуел со Исланд во квалификациите за Европското првенство во 2020 година. Селекторот Данило Брестовац го одработи првиот работен час по назначување на функцијата и го затвори конечниот список со 16 играчи кои утре изутрина ќе ги поведе кон Рејкјавик. Дуелот со Исланѓаните, за кој отпаднаа Мартин Томовски, Мартин Серафимов, Мартин Манасков и Димитар Димитриоски, е во среда со почеток во 21:45 часот.
Меѓу „црвено-жолтите“ за натпреварот против Исланд ќе има по двајца дебитанти (Томислав Јагуриновски и Бојан Маџовски) и повратници (Никола Маркоски и Милорад Кукоски). Останатите 12 се голманите Борко Ристовски и Никола Митревски, десните крила Гоце Георгиевски и Мартин Поповски, левите крила Дејан Манасков, дефанзивецот Велко Маркоски, кружните напаѓачи Стојанче Стоилов, Жарко Пешевски и бековите Кирил Лазаров, Филип Талески, Марио Танкоски и Филип Кузмановски.
Реваншот со Исланд е во недела во СЦ „Борис Трајковски“. Македонската репрезентација е со половичен ефект по два одигра меча во квалификациите за ЕП 2020. Во Битола ја совлада Турција со 31:27, а во Кожани доживеа сензационален пораз од Грција со 26:28.