Под мотото „Развој за сите“, грчкиот премиер Кирјакос Мицотакис на отворањето на 84. Меѓународен саем во Солун ја претстави владината програма за наредните 12 месеци, соопштувајќи мерки во четири области поврзани со развојот и најави даночни олеснувања што ќе бидат вклучени во буџетот за 2020.
Тој рече дека во неговиот прв говор како лидер на опозицијата го повикал народот на „Договор за вистината“, а сега во првиот говор како премиер, ги повика Грците на „Договор за создавање, активност, резултат, обнова и за напредок“. Истакна дека земјата свртила нова страница и „тоа се гледа на лицата на граѓаните“.
„Грција не е повеќе црна овца во Европа туку е земја со самодоверба што активно учествува во европските случувања. Грцина не е земја што говори само за нејзините проблеми туку бара заеднички решенија за големите предизвици на нашиот континент. Од климатските промени и технолошката револуција до бегалското прашање и можностите на заедничка одбранбена политика“, рече Мицотакис.
Во 75-минутното обраќање, тој акцентот го стави на развојот и економијата, како клучни за секој чекор на земјата, но и услов за безбедноста и просперитетот.
„Четири области се главни и активностите ќе одат во насока за развој на даночната политика, за инвестициите, за односите на работниците и за продуктивната дигитална држава“, рече грчкиот премиер.
Меѓудругото, Мицотакис најави намалување на данокот на бизнисите од 28 на 24 отсто, пролонгирање на ДДВ-то за новите градби за три години, 40 отсто попуст за трошоците за реновирање или надградба на постоечките објекти, производите за бебиња, детските седишта и заштитните шлемови се вклучуваат во категоријата со намалено ДДВ од 13 отсто, за секое новороденче во 2020 година се планирани 2.000 евра по семејство.
Во однос на инвестициите истакна дека веќе се работи на многу бизнис планови планирани до крајот на оваа година, а најави и инвестиции во туризмот, како и нови поволни услови за инвеститорите.
„Веднаш ќе се одредат поповолни услови за привлекување стратешки инвестиции. Ќе се поедностави постапката за издавање на лиценците што се поврзани со животната средина според европските стандарди. Се олеснува и поставувањето деловни паркови. За информирање и привлекување инвеститори, ќе се формира Регистар со инфраструктура на целата земја и дигитална мапа“, истакна грчкиот премиер говорејќи во делот на инвестициите.
Тој говореше и за владината цел за заштита на вработените како и отворање нови работни места.
За четвртата област, за дигиталната реалност рече дека Грција е меѓу последните на сите дигитални индикатори, се наоѓа на 26 позиција од 28 земји членки на ЕУ и истакна дека нивна заложба е во следните четири години, Грција да се најде во просекот.
При крајот на обраќањето, во делот од говорот што се однесуваше на Северна Грција, Кирјакос Мицотакис се осврна и на промоцијата, заштитата и зајакнувањето на производите што го носат називот „македонски производи“ и на брендот „Македонија“.