Македонската фудбалска репрезентација за првпат завршува квалификации како третопласирана во група. „Црвено-жолтите“ вечерва на арената „Тоше Проески“ го совладаа Израел со 1:0 во последното коло од циклусот за Европското првенство во 2020 година. Стрелец на единствениот погодок беше Бобан Николов во втората минута од судиското екстра време на првиот дел за финиш во групата Г како што се почна со победа над Летонија со 3:1.
Третото место во конкуренција на Полска, на Австрија, на Словенија, на Израел и на Летонија не носи пласман на ЕП 2020. Но, десетте солидни квалификациски меча даваат реална надеж за негување амбиции дека завршниот турнир може да се дофати преку Лигата на нации. Ривал во полуфиналето е Косово, победникот ќе игра во плејоф финале со подобриот од дуелот Белорусија – Грузија за патникот на континенталниот самит од Д дивизија.
Македонија забележа по четири победи и порази и двапати ремизира во квалификациите за ЕП 2020 со вкупна гол разлика 12:13. На домашен терен загуби од Полска (0:1) и од Австрија (1:4) и славеше во останатите три настапи во Скопје – против Летонија со 3:1, против Словенија со 2:1 и против Израел со 1:0, а три бода освои и на мегдан на Летонците во Рига (2:0). Двата нерешени исхода се запишани на гостувања – против Израел (1:1) и против Словенија (1:1) додека од Австријците и Полјаците загуби и во Виена (1:2), односно, Варшава (0:2).
Пласман на ЕП 2020 преку редовните квалификации обезбедија Англија, Чешка, Украина, Португалија, Германија, Холандија, Швајцарија, Данска, Хрватска, Велс, Шпанија, Шведска, Полска, Австрија, Франција, Турција, Белгија, Русија, Италија и Финска.
Квалификации за ЕП 2020
Група Ц
Германија – Северна Ирска 6:1
Холандија – Естонија 5:0
Табела: Германија 21 бода, Холандија 19, Северна Ирска 13, Белорусија 4, Естонија 1.
Група Е
Велс – Унгарија 2:0
Словачка – Азербејџан 2:0
Табела: Хрватска 17 бода, Велс 14, Словачка 13, Унгарија 12, Азербејџан 1.
Група Г
Македонија – Израел 1:0
Полска – Словенија 3:2
Летонија – Австрија 1:0
Табела: Полска 25 бода, Австрија 19, Македонија 14, Словенија 14, Израел 11, Летонија 3.
Група И
Шкотска – Казахстан 3:1
Сан Марино – Русија 0:5
Белгија – Кипар 6:1
Табела: Белгија 30 бода, Русија 24, Шкотска 15, Кипа 10, Казахстан 10, Сан Марино 0.