Легендарниот НБА кошаркар, Коби Брајант на 41 годишна возраст го загуби животот во хеликоптерска несреќа во Калифорнија. Во падот на леталото, медиумите првично известија за уште четири настрадани лица меѓу кои и неговата 13 годишна ќерка Џана Марија Оноре Брајант.
Покрај нив двајца, со хеликоптерот на кошаркарски натпревар патувале и другарка на ќерката на Брајант и нејзиниот татко, Џон Алтобели, бејзбол тренер на колеџот Оринџ Каунти и пилотот на хеликоптерот.
Но, шерифот Алекс Валануева на официјална прес-конференција откри дека во хеликоптерската несреќа загинале девет лица – пилотот плус осум патници, без да каже кои се преостанатите четворица кои смртно настрадаа кај Калабасас во Калифорнија.
Дел од медиумите, првично, известија дека меѓу патниците во хеликоптерот бил и поранешниот кошаркар на Лос Анџелес Лејкерс, Рик Фокс чиј адвокат ја демантира веста за порталот „ТМЗ“.
Жителите на Калабасас во чија околина се случи несреќата опишаа дека слушнале бучава од што заклучиле дека нешто не е во ред.
Социјалните мрежи се веќе преплавени со емоции за еден од најголемите личности во поновата историја на кошаркарскиот спорт. Во изразувањето на сочувства, покрај колеги на Брајант, се придружија и политичарите кои со неверување ја примија веста за хеликоптерската несреќа во Калифорнија. Меѓу нив и претседателот на САД, Доналд Трамп.
Дерби мечот меѓу израелски вечни ривали Макаби и Хапоел беше прекинат при добивање на веста за смртта на еден од најголемите кошаркари во историјата. Солзи меѓу кошаркарите на теренот, но и меѓу гледачите на трибините кои упатија громогласен аплуаз за ѕвездата на Л.А. Лејкерс по што цела сала почна да го скандира неговото име.
Информација за несреќата прв објави американскиот таблоид „ТМЗ“ за потоа и „Лос Анџелес Тајмс“ да излезе со фотографија од местото на несреќата со дополнување дека сите патници и членови на екипажот ги загубиле животите во падот на хеликоптерот.