Бројот на починати од коронавирусот се зголеми на 305, а регистриран е прв смртен случај надвор од Кина. На Филипини, борбата со болеста ја загуби 44 годишен кинески државјанин од Вухан како последица на тешко воспаление на белите дробови. Појавата на вирусот е потврдена во повеќе од 25 земји во светот, а бројот на заразени се зголеми на 14.300, пренесува „Си-Ен-Ен“.
Голем број земји организираа авионски превоз за своите граѓани кои во моментов се наоѓаат во областите во кои се појави вирусот, а се воведуваат и други превентивни мерки, како двонеделен карантин и забрана за летови кон Кина.
Кинескиот премиер Ли Кечијанг ги повика фабриките за медицинска опрема за контрола на вирусот да го зголемат производството и предупреди дека продавниците не смеат да бидат затворани.
Најголем број починати и заразени има во провинцијата Хубеи и главниот град Вухан, каде се појави вирусот.
Масовна евакуација од Вухан, центарот на коронавирусот
Од Вухан, центарот на епидемијата на коронавирусот, со воени авиони од различни земји во тек е евакуација на странските државјани кои веднаш по слетувањето се прегледуваат и упатуваат во двонеделен карантин. Во меѓувреме, се поголем број авиокомпании ги прекинаа летовите кон градот, но и Кина со чартер летови ги враќа граѓаните на провинцијата Хубеи од странство.
Во Франкфурт синоќа слета авион од Вухан со 128 патници, претежно германски државјани, кои ќе минат двонеделен карантин во воена база.
Авион на турската армија од Вухан слета во Анкара со 42 лица, од кои 32 се турски државјани, а останатите се државјани на Албанија, Грузија, Бугарија и Азербејџан. Како што пренесе Анадолија, пристигнати се и 17 членови на екипажот и сите ќе бидат префрлени во болница каде ги поминат наредните две недели поради претпазливост.
Франција, исто така, ги евакуира своите државјани, а првата група стигна во петокот.
Од Вухан денеска треба да полета и авион со италијански државјани, кои по слетувањето во Рим ќе бидат упатени во карантин во воена база, најави италијанскиот министер за надворешни работи Луиџи ди Мајо.
Руската војска почнува евакуација на своите државјани од Кина во понеделник и вторник, јави агенцијата ТАСС.
Стотина државјани на САД и Јапонија веќе се евакуирани од Вухан. Пентагон го одобри барањето на Министерството за здравство за помош и сместување на околу илјада луѓе кои ќе бидат во карантин по пристигнувањето од странство. Во случај на потреба одредени се четири воени објекти, два во Калифорнија и по еден во Колорадо и Тексас.
Австралија, Нов Зеланд, Јужна Кореја, Индонезија, Велика Британија, Индија и Малезија, исто така, планираат да ги евакуираат своите граѓани од Кина.
Авионите веднаш по слетувањето се чистат со специјални хемикалии кои треба да ги отстранат сите можности за пренесување на овој вирус.