За мене политиката не е пазар и тоа е погрешното што се случуваше во минатиот парламентарен состав, туку е филозофија, а за некој пратеник да поддржи одредена политичка опција, треба да има определена точка што ќе го поврзе со понудената програма. Врз основа на разговорите и на луѓето во кои бескрајно верувам и се дел од пратеничката група „За обнова на Македонија“, не сметам дека постои некој кој ќе ја поддржи програмата на Заев, која би била програма за работа на идна влада предводена од СДСМ, рече денеска лидерот на ВМРО-ДПМНЕ, Христијан Мицкоски по конституирањето на новиот собраниски состав.
Одговорајќи на новинарски прашања по обраќањето, Мицкоски уште еднаш изрази уверување дека ВМРО-ДПМНЕ ќе ја формира новата влада, која, како што истакна, треба да биде реформска, со јасен план и визија за справување со предизвиците.
Мицкоски најави дека во периодот што следува, ВМРО-ДПМНЕ ќе ги зачести средбите со политичките партии кои се дел од сегашниот парламентарен состав, но не само со оние од албанскиот блок, туку и со оние од коалицијата на СДСМ. Можеби и тие, рече, ќе ја препознаат реформската програма на ВМРО-ДПМНЕ и ќе ја поддржат.
Искуствата од претходниот парламентарен состав, оцени Мицкоски, не може да бидат применети од овој состав.
„Да оставиме времето да покаже кој ќе го формира парламентарното мнозинство. Да, на оние пратеници на кои им пристапиле мистериозни личности што се повикуваат на раководството на СДСМ, пријдоа, кажаа и со згрозување ги одбија. И јас со згрозување одбивам да коменитрам ваков вид пазар зашто на тој начин само ги демотивираме и деморализираме нашите сограѓани за следните избори кои на една година од сега ќе бидат локални. Верувам во политичка мудрост, политичка програма и политичка филозифија, а не на пазар како што се случуваше во претходниот парламентарен состав“, нагласи Мицкоски.
Тој рече дека со Заев единствено се согласува дека е потребно формирање на стабилна, реформски ориентирана влада, без коруптивни афери и во која ќе партиципираат луѓе необременти со коруптивни афери и криминал, која ќе ги спроведе реформите и на која приоритет ќе и бидат судството, здравството и образованието.
Во однос на претстојните преговори, рече дека координација засега немале, туку се координирале, како што бил информиран, само координаторите на пратеничките групи од претходниот собраниски состав. На прашањето за ДПА, Мицкоски одговори дека Мендух Тачи своеволно ќе одлучи која програма ќе ја поддржи.
„На состаноците што претстојат, очекувам Тачи да донесе вистинска одлука, дали ќе остане во опозиција“, рече Мицкоски.
ВМРО-ДПМНЕ во изминатиот период, но и во претстојниот ќе се насочи на преговори за формирање на ново парламентарно мнозинство што ќе значи и нова Влада со фокус на решавање на вистинските проблеми, пред сè, со справување на предизвиците од Ковид-19 и со последиците од неа и справување со економската криза која е на повидок и сите ја чувствуваме, додаде Мицкоски по конститутивната седница во Собранието.
„Но, и што да се случи во преговорите во наредните денови, пратениците на ВМРО-ДПМНЕ кои ќе бидат дел од овој парламентарен состав ќе бидат фокусирани исклучиво на предлози што ќе значат вистинска борба против корупцијата и криминалот. Ќе зборуваме гласно во новата влада која се надеваме дека ќе ја формира ВМРО-ДПМНЕ и веднаш со интензивни мерки ќе се справиме со овие предизвици кои навистина ги мачат нашите граѓани“, потенцира Мицкоски.
Тој очекува да се обиде да обезбеди парламентарно мнозинство што во иднина ќе поддржи, како што рече, една „вистинска реформска влада која на брза лента ќе ја однесе Македонија пред рамноправно членство во ЕУ“.
Мицкоски изјави дека грубо и спротивно на сите меѓународни препораки се менувал Изборниот законик и обвини дека последните избори се најнедемократски и корумпирани што се одржале во земјава.