Published: Monday, June 21, 2021 13:45
Пратениците во шведскиот парламент му изгласаа недоверба на премиерот Стефан Левен, откако опозиционите партии се спротивставија на неговиот предлог закон за одредување на висината за станарина. На историското гласање за недоверба се изјасниле 181 пратеник, со што Левен стана првиот премиер на Шведска кој ја загуби довербата во парламентот.
Гласањето се реализира по иницијатива на шведските демократи, а за изгласување на недоверба беше потребна поддршка на 175 пратеници од 349 члениот парламент.
Левен им понуди на партиите да се договорат за новото одредување на кириите за станови и така да ја решат најголемата политичка криза во поновата историја на Шведска.
– Даваме прилика за пронаоѓање на решение.Очекуваме другите политички партии да се подготват , да бидат одговорни и да не ја вовлечат Шведска во политичка криза“, изјави вчера премиерот Стефан Левен кој е воедно и претседател на Социјалдемократската партија.
Но, овој предлог набрзо го одби Левица која ја поддржа малцинската влада на Левен, а сега ја поддржа опозицијата во изгласување на недоверба.
Левен сега е исправен пред две опции – да поднесе оставка или да распише вонредни парламентарни избори за што има рок од седум дена да донесе одлука.