Европската агенција за лекови (ЕМА) ја утврди можната поврзаност меѓу ретките срцеви заболувања и мРНА вакцината против ковида-19 на „Фајзер“/„Бајонтек“ и на „Модерна“, додека за луѓето со ретки крвни нарушувања препорача да не се вакцинираат со вакцината на „Џонсон&Џонсон“.
Срцевите проблеми миокардитис (воспаление на срцевиот мускул) и перикардитис (воспаление на срцевата обвивка) мора да бидат наведени како можни несакани ефекти на двете мРНА вакцини, соопшти денеска Одборот за безбедност на Европската агенција за лекови.
Таквите случаи се појавиле во рок од 14 дена по вакцинирањето, почесто по втората доза и кај млади возрасни мажи, наведува ЕМА. Ова се совпаѓа со наодите на американските здравствени власти објавени минатиот месец.
Панелот на ЕМА, исто така, се истакна дека луѓето со синдром на истекување на капиларите (ЦЛС) не треба да се вакцинираат со вакцината на „Џонсон&Џонсон“. Во јуни, ЕМА побара ЦЛС да се додаде на списокот на несакани ефекти од вакцината на „АстраЗенека“.
Вакцините на „АстраЗенека“ и на „Џонсон&Џонсон‘ користат различни верзии на вирусот на настинка за да пренесат упатства за создавање протеин на коронавирусот и да предизвикаат имунолошки одговор. Европската агенција за лекови, исто така, соопшти дека е премногу рано да се знае дали ќе бидат потребни повеќе од две дози вакцина против ковид-19. Се смета дека засега се доволни две дози.
„Фајзер“ и „Бајонтек“ вчера соопштија дека од американските и европските регулатори планираат да побараат одобрување на довакцинација со трета доза, врз основа на докази за зголемен ризик од зараза шест месеци по вакцинацијата и поради ширењето на многу заразната делта варијанта на вирусот, која прво беше идентификувана во Индија.