Ковакс механизмот ќе добие 110 милиони дози на вакцини против коронавирус од кинеските компании „Синовак“ и „Синофарм“ кои ќе бидат од помош на меѓународниот систем во справување со недостигот поради новиот бран на пандемијата, соопшти денеска Сојузот за вакцини (Гави). Договорот со кинеските фармацевтски групи вклучува и опции за набавка на дополнителни дози во наредните месеци, се вели во соопштението.
– Благодарение на овој договор, можеме веднаш да започнеме со испорака во земјите, рече Сет Беркли, раководител на Гави.
Ковакс механизмот, кој требаше да гарантира еднаков пристап до вакцините и на богатите и на сиромашните земји, досега дистрибуира над 102 милиони дози на вакцини во 135 земји, што е незначително помалку од планираното.
Околу 170 милиони дози од вакцината на „Синофарм“, во зависност од потребите, може да се обезбедат до крајот на првата половина на 2021 година. Во случајот со „Синовак“, вкупниот број на купени дози може да достигне 380 милиони до крајот на јуни во 2022 година. Овие вакцини ќе бидат достапни за сите земји кои плаќаат за вакцините, како и за земјите што ќе ги примаат вакцините како донација.
Ковакс механизмот планира да дистрибуира две милијарди дози до почетокот на 2022 година, вклучително и 1,8 милијарди за 92 најсиромашни земји.