Денеска во 13 часот по македонско време, на Националниот стадион во Токио, ќе бидат отворени 32-те Летни олимписки игри, но без присуство на гледачи. На трибините ќе има само 950 службени лица: дипломати, спонзори и претставници на Меѓународниот олимписки комитет (МОК), а најавено е присуство и на 15 шефови на држави и меѓународни организации.
Македонија на Игрите во Токио испрати осум спортисти. Во улога на знаменосец за време на свеченото дефиле ќе биде таеквондистот Дејан Георгиевски. Со него требаше да се појави и џудистката Арбреша Реџепи која, сепак, ќе ја пропушти церемонијата поради делумната илозација што по блискиот контакт што го имала на пат кон Јапонија со позитивно лице на коронавирусот. Георгиевски во Токио ќе настапи во категоријата + 80 килограми, додека Реџепи во категоријата до 52 килограма.
Останати македонски репрезенти на олимписките борилишта ќе бидат
Миа Блажевска Еминова – пливање/100 метри
Филип Деркоски – пливање/400 метри
Борјан Бранковски – спортско стрелаштво/10 метри
Пуликсенија Јованоска – карате/кати
Јован Стојоски – атлетика/400 метри
Магомедгаджи Нуров – борење слободен стил/97 килограми.
На Олимпијадата што ќе трае до 8 август ќе учествуваат околу 12.500 спортисти од целиот свет.
Игрите во Токио требаше да се одржат во минатата година, но поради пандемијата на ковид-19 беа одложени за 12 месеци. Но, и покрај тоа, проблемот со коронавирусот не е целосно надминат и ситуацијата во градот домаќин се влошува од ден во ден. Северна Кореја и Гвинеја веќе донесоа одлука да се повлечат од Игрите, а повеќе врвни спортски работници, како и луѓе од организацијата се скептични дека во услови на пандемија, најголемиот спортски светски настан може да мине без проблеми.
Од Меѓународниот олимписки комитет се децидни дека Олимписките игри ќе се одржат според зацртаниот натпреварувачки календар и дека со мерките на претпазливост, спортистите ќе бидат безбедни.