Се движиме во погрешна насока, изјави водечкиот американски епидемиолог Ентони Фаучи и изрази загриженост бидејќи САД непотребно се најдоа во ситуација на зголемен број на нови случаи на инфекции со ковид-19 поради невакцинирани лица и ширење на многу заразниот Делта сој.
Фаучи потврди дека владините службеници „активно ја разгледуваат“ препораката за вакцинираните лица да носат заштитни маски и лицата со намален имунитет да бидат повторно вакцинирани.
– Оваа ситуација со зголемување на бројот на новозаразени главно се одразува на невакцинираните, па затоа бараме тие да дојдат и да се вакцинираат, рече Фаучи.
Главниот медицински советник на претседателот Џо Бајден за „Си-Ен-Ен“ потврди дека учествувал во разговори за промена на упатствата за заштитни маски и нагласи дека некои локални самоуправи во кои се зголемува стапката на инфекција, како Лос Анџелес, веќе апелираат до граѓаните да носат маски во затворени јавни простори, без оглед дали се вакцинирани.
Според американскиот Центар за контрола и превенција на болести, над 163 милиони Американци, или 49 проценти од вкупната популација на САД, се целосно вакцинирани.