Околу 19.000 луѓе беа евакуирани од Кабул во вторникот, а вкупно 82.300 од 14 август, соопшти Белата куќа, во услови кога меѓународната заедница се обидува да извлече што е можно повеќе луѓе од Авганистан до 31 август, кога е рокот за повлекување на странските војници од таа земја. Талибанците кои ја презедоа контролата над Авганистан, во повеќе наврати соопштија дека немаат намера да го пролонгираат рокот.
Во изминатите 24 часа се реализирани 42 американски воени летови и 48 на коалициските сили кои помагаат во евакуација на луѓе од главниот град на Авганистан, меѓу кои дипломати и Авганистанци кои соработувале со меѓународни организации или странски држави.
Во најголемата досега операција, САД и нивните сојузници од 14 август евакуираа над 80.000 луѓе, вклучувајќи и свои граѓани, персонал на НАТО и загрозени Авганистанци, еден ден пред талибанците да влезат во Кабул и да стават крај на 20-годишното присуство на странска војна.
Американскиот претседател Џо Бајден рече дека САД ќе се држат до крајниот рок (31 август) за целосно повлекување на војската, и покрај предупредувањата од европските сојузници дека не сите загрозени Авганистанци ќе можат да заминат дотогаш.
Франција ќе ги продолжи операциите за евакуација од Авганистан што е можно подолго, но најверојатно ќе ги заврши тие операции во следните часови или денови пред крајниот рок до 31 август, изјави владиниот портпарол Габриел Атал. Тој додаде дека сè уште не може да даде прецизен рок за завршување на француската евакуација од Авганистан.
Британскиот министер за надворешни работи, Доминик Рааб изјави дека крајниот рок за евакуација на луѓето е до последната минута од август.
Десетици илјади Авганистанци го окупираа аеродромот во Кабул во страв од прогон, а среќниците обезбедија место на летовите, пишува Хина.
Холандската влада стравува дека оние што ги исполнуваат условите за азил нема да бидат евакуирани навреме. Холандските војници успеаја да одведат повеќе од 100 луѓе на аеродромот во Кабул, рече министерката за надворешни работи Сигрид Кааг, но стотици други би можеле да останат таму.
Напорите за евакуација на Унгарија се при крај, откако централноевропската земја евакуираше повеќе од 500 луѓе од Кабул кои помагале на унгарска добротворна организација или унгарски војници.