На иницијатива на Музејот на македонската борба за самостојност, семејството на големиот македонски поет Анте Поповски донира 46 лични предмети, соопшти директорката на музејот, Даниела Николова на отворање на четвртото издание на меѓународната поетско-културна манифестација „Анте Поповски – Антево перо“.
Годинашниот добитник на почесното признание „Антева златна книга“ е академик Влада Урошевиќ. Наградата му ја врачи професор доктор Венко Андоновски.
Добитник на наградата „Антево перо“ е поетот Братислав Ташковски за книгата „Небесни разговори“. Наградата „Антев златник“ ја добија Елизабета Баковска за збирката поезија „Сите болки станаа мои“ и Димитар Арнаудов за книгата „Ѕвезден часовник“.
Наградата „Антев часовник“ што се доделува за млад автор ѝ припадна на Марија Филипова за книгата „Твоите далги на брегот на Стикс“. Антевиот часовник што ѝ беше врачен на младата авторка, всушност припаѓал на великанот Поповски.
Како дел од манифестацијата се одржа и поетско читање на кое настапија овогодишните добитници на наградата „Антево перо“.
За оваа награда конкурирале дури 69 автори. Синот на Анте Поповски, Александар вели дека во изминатите четири години како постои манифестацијата, пријавени се 320 електронски книги.
Манифестацијата продолжува и денеска во Лазарополе, родното место на Анте Поповски со научниот симпозиум „Антево дело“, што од оваа година има меѓународен карактер. На симпозиумот ќе учествуваат десетина истакнати книжевни проучувачи, при што ќе се отворат и прашања за досега помалку истражувани сегменти од волуменозниот творечки опус на Поповски.
Во Лазарополе ќе биде организирана и вечер со творештвото на академик Анте Поповски, именувано според неговата прва книга – „Одблесоци“, а во текот на третиот ден од манифестацијата, учесниците ќе ја посетат неговата родна куќа по што во Паркот на книжевноста ќе се одржи поетското читање „Провиденија“.