Соединетите Американски Држави потврдија, речиси, милион нови случаи на коронавирус во понеделникот, што е најмногу во светот, додека високо заразниот омикрон сој не покажува знаци на забавување.
Бројот на хоспитализирани пациенти е зголемен за речиси 50 отсто во изминатата недела и сега изнесува над 100.000, објавија американските медиуми.
Во текот на изминатата недела, просечниот број на новозаразени изнесувал 486.000 дневно, а тој број е двојно зголемен за седум дена. Меѓу 978.856 новозаразени во понеделникот, се наоѓаат и некои случаи од саботата и неделата, бидејќи многу држави не известуваат за време на викенди.
Просечниот број на смртни случаи од ковид-19 во САД се движи околу 1.300 дневно.
Според податоците на Американската академија за педијатрија и Здружението на детски болници, минатата недела се регистрирани повеќе од 325.000 заразени деца, што е речиси двојно повеќе од пред две недели.
Белата куќа вчера соопшти дека администрацијата на претседателот Џо Бајден ги финализира договорите за 500 милиони брзи тестови за коронавирус кои планира да ги подели бесплатно на Американците со цел да се намали притисокот врз местата за тестирање. Дополнително, администрацијата двојно ја зголеми нарачката за антивирусен лек на „Фајзер“ против ковид-19.
Здравствените власти нагласуваат дека вакцинациите и дополнителните дози остануваат најдобриот начин за избегнување на тешки форми на болеста.