Заклучокот од денешната средба на вицепремиерот за европски прашања Бојан Маричиќ со „Вајмарската тројка“, Лоранс Бун, државна секретарка задолжена за Европа при Советот на министри на Република Франција, Ана Лирман, министерка за Европа и клима на Сојузна Република Германија и министерот за Европска Унија на Република Полска, Шимон Шинковски вел Сенк, е дека го имаме своето место во ЕУ, но дека е време за храбри одлуки и реафирмација на консензусот за европската иднина на Северна Македонија.
Француската министерка Бун истакна дека за нас има три пораки и тоа дека Северна Македонија припаѓа на семејството на ЕУ, втората дека одлуката е наша, а третата е дека сега треба да се направи чекорот поради импулсот на сила што го имаме за проширување на ЕУ.
Оваа дискусија околу Уставот нема да повлекува нови барања од Бугарија и од ниедна друга земја, нагласи Бун, потенцирајќи дека исто така треба да се спроведат реформите за влез во ЕУ, како на пример оние во делот за владеењето на правото.
Германската министерка Лирман кажа дека нивната порака е јасна и дека тие ја нагласуваат нивната заложба Северна Македонија да биде дел од ЕУ.
Меѓу другото, и оддадоа признание и на нашата непоколеблива посветеност во НАТО.
Ве поттикнуваме успешно да продолжите со реформите, рече Лирман.
Следниот чекор, додаде таа, се измени на Уставот и овие измени ќе ја покажат земјата како мултиетничко општество.
Цврсто ги поттикнуваме сите политички сили да ја поддржат промена на Уставот. Се друго ќе биде штетно за влезот на Северна Македонија во ЕУ, рече германската министерка.
Полскиот министер истакна дека пораката е едноставна, а тоа е дека Полска, Франција и Германија сакаат да ја поддржат Северна Македонија на патот на ЕУ.
Уставните измени, како што кажа тој, ќе бидат сериозна одлука за Северна Македонија.
Како што беше најавено тема на разговорите биле преговорите со ЕУ, со фокус на исполнувањето на обврските и задачите кои произлегуваат од преговарачката рамка и забрзувањето на евроинтеграцискиот процес.
„Вајмарската тројка“ ќе оствари средба и со претседателот на ВМРО – ДПМНЕ Христијан Мицкоски, а потоа ќе се сретне и со премиерот Димитар Ковачевски, со претседателот Стево Пендаровски, како и со претседателот на Собранието Талат Џафери и со координаторите на пратеничките групи.