Косовската полиција во соопштение по нападот во петопкот навечер на водниот канал „Ибар-Лепенец“ кај Зубин Поток во северно Косово, соопшти дека е нападната критичната инфраструктура на земјата, а од увидот на стручни тимови на местото на настанот е заклучено дека експлозијата била намерна, што го прави овој напад терористички и криминален чин.
Полицијата соопшти дека нејзини експертски тимови веднаш излегле на местото на настанот и за случајот ги известиле сите надлежни институции, итната помош, Водоводот, претпријатието Ибар-Лепенец и Косовската енергетска корпорација.
Косово работи на подобрување на снабдувањето со вода и електрична енергија и зајакнување на безбедноста на стратешките локации по експлозијата што го оштети каналот што испраќа вода до нејзините две главни централи, инцидент што Приштина го означи како „терористички чин“ и ја обвини Србија за тоа.
Српскиот министер за надворешни работи Марко Ѓуриќ ги отфрли, како што ги нарече, „неоснованите обвинувања“ за вмешаноста на Белград и посочи дека владата на косовскиот премиер Албин Курти е одговорна за експлозијата.
Косовскиот премиер Албин Курти ги обвини криминалните елементи во Србија за нападот во петокот, Тој изјави дека оние кои го извршија овој напад не се само обични криминалци, тоа го прави добро организирана структура која многу добро знае дека исклучувањето на водата на таа локација ќе влијае и на производството на електрична енергија.