Иако Кривичниот суд пред два месеца одлучи да ги врати пасошите на демонстрантите Здравко Савески и Владимир Куновски, забраната за напуштање на државата се уште не е укината.
Демонстрантите кои се товарат за демолирање на Канцеларијата на Иванов за време на протестите против аболицијата, велат дека врз нив се врши изживување.
– Сакам да нагласам дека иако судот на претходното рочиште нас ни ја укина мерката за забрана за излез од државата, полицијата користи бирокрaтски механизми, цели два месеци да не ја трга забраната за излез од државата за мене и колегата Куновски. Тоа го сметам за изживување, но нека не берат гајле, нас не можат така лесно да не скршат. Режимот кој е осомничен за сторен крупен криминал и крадење на народните пари шетаат слободно, борците против криминалот, режимот води постапки против нив, рече Здравко Савески по денешното рочиште.
Савески вели дека иако во МВР доставиле решение дека мерката на претпазливост е укината, сепак од МВР им посочиле дека потребен е службен допис од Судот. Од Судот велат дека уште еднаш ќе ја извести полицијата дека мерката е укината.
Судењето за двајцата демонстранти кои се членови на политичката партија Левица денеска се соочија со повторно одложување на рочиштето, бидејќи Судот ги нема добиено сите прекршочни постапки кои се водат за целиот настан. Судот уште чека да се достават сите прекршочни пријави и да се направи проценка кој колку направил штета на објектот.
-Од МВР не добија одговор за прекршочните постапки којшто се водат во врска со целиот настан. За овој настан се водеа прекршочни и кривични постапки што секако има импликации во однос на понатамошното барање на штета, во однос на некаков солидарен договор. До денешниот ден не беше стигнато тоа и затоа се одложи, посочи адвокатот Сашо Дуковски.
Од страна на Јавното правобранителство штетата беше проценета на 522 илјади денари. Судењето продолжува на 18. октомври