Прволигашка кошарка во Македонија ќе нема ниту викендот. Предлогот на Куманово за поместување на стартот на шампионатот беше едногласно прифатен на состанокот на Здружението на клубови од Прва лига мажи. Беше образложен со неможноста да се организираат натпревари од законски и технички причини или немање време за нивно пријавување во Министерството за внатрешни работи (МВР) на 48 часа пред почеток, но и со котизацијата што треба да се плати за сезоната 2016/17 и висината на таксите за регистрација на странски играчи. Клубовите по ова прашање зазедоа став да ги регулираат своите обврски по Вонредното собрание на 15 декември по цена што ќе биде поставена од актуелната гарнитура во Македонската кошаркарска федерација (МКФ) или евентуална нова ако дојде до смена на претседателот Петар Наумоски.
Пред присутните претставници на клубовите (немаше само Пелистер) беа ставени заклучоците и одлуките од последниот состанок на Управниот одбор (УО) на МКФ. Во тој контекст повторно беше изразено незадоволство од начинот на функционирање на Федерацијата со ова раководство во кое се вперува прст како најодговорно за ќор-сокакот во кој е навлезена македонската кошарка.
На седницата на УО на МКФ во вторникот беше отфрлена иницијативата на клубовите за Вонредно собрание како нелегитимна. На предлог на претседателот Наумоски, највисокото тело ќе биде свикано да расправа за недоразбирањата на релација клубови – Федерација на 15 декември. Беше заклучено да почне да се игра кошарка во претстојниот викенд и до наредниот (пред почеток на второто коло) да се подмират обврските кон МКФ за сезоната што претстои, но и сите заостанати од минатите сезони како и таксите за регистрација на странските играчи по новата тарифа.