Карпош С. имаше сили за едно полувреме во Белград, но не и за две против Црвена звезда. По 38:38 по воведните две четвртини, белграѓани уфрлија во поголема брзина во наредните две, ги добија со 53:32 за конечни 91:70 во 10. коло во АБА лигата. По 21 поен за евролигашот постигнаа Симоновиќ и Бјелица, Гудуриќ даде 11, Дангубиќ 10. Лабовиќ беше единствениот двоцифрен „сокол“ с0 16 коша.„
„Ѝ реков на екипата дека треба да ја „преживееме“ 25 минута. Со Цедевита, Цибона и Партизан, Црвена звезда во тој дел од мечевите во просек водеше по 25 поени разлика. Ние како последнопласирани дојдовме да играме против таков тим и успеавме во тоа против вака квалитетна Звезда која игра најдобра кошарка во Европа. Ја „преживеавме“ 25 минута, сите карти ги фрлив на тоа, а потоа пред крај на третата четвртина дојде до тотална деконцентрација. Се прашувам дали и репрезентација на АБА лигата би ја победила Црвена звезда на нејзин паркет“, рече по мечот Драган Николиќ, тренер на Карпош Соколи.
Клучниот период на средбата се случи од 27 минута до 33. „Црвено-белите“ направија серија од 21:5 и минималната предност од 49:48 ја претворија во убедлива (69:54) и прашањето на победникот беше затворено. Асистенциите и загубените топки, се чини, го детерминираа текот на средбата. Домашните кошаркари значително повеќе се разигруваа во второто полувреме (26) и напроти 20 асистенции на Карпош С., и за „продадоа“ 10 напади или седум помалу од дебитантот во јадранското кошаркарско друштво.
Она што особено го загрижува Дејан Радоњиќ, тренерот на Црвена звезда е состојбата со Лука Митровиќ кој предвреме го заврши мечот.
„Се надевам дека Митровиќ не е сериозно повреден. Таков е мојот првичен впечаток. Долг период бевме без концентрација и енергија. Како што и најавив, пет патувања во осум дена, тешко е. Потоа делувавме поинаку. Во оваа лига нема лесни мечеви за нас, има тешки и мнгу тешки“, истакна Радоњиќ.
Црвена звезда останува единствена непоразена во АБА лига по 10 одиграни натпревари, а „соколите“ ќе бараат шанса за втора победа во сабота (21 ч.) против Цедевита во Скопје.